Sýret: kazakhexport.kz
Qazir jańa ınvestısııalyq kezeńge aıaq basatyn ýaqyt keldi. Baıqap otyrsaq, ınflıasııa baıaýlap, byltyrǵy joǵarǵy deńgeıden 2,5 ese tómendep otyr. Elimizdiń halyqaralyq rezervi 100 mlrd dollardan asty. Endigi basty mindet – ınvestısııa úshin otandyq bıznestiń turaqty bolýyn qamtamasyz etip, ekonomıkanyń ınnovasııalyq, joǵary tehnologııalyq sektorlaryn damytý.
Prezıdent Joldaýda shaǵyn jáne orta bızneske basa nazar aýdardy. 2029 jylǵa qaraı orta bıznestiń el ekonomıkasyndaǵy úlesi 15 paıyzǵa jetýi kerek. Búginde otandyq kásipkerlerge jan-jaqty qoldaý kórsetetin túrli memlekettik jáne jeke sektordaǵy kompanııalar bar. Alaıda jekelegen keısterdi qarastyrsaq, memlekettik qoldaý sharalaryn áli de birizdilikke salyp, tıimdiligin arttyra túsirý qajettiligi baıqalady. Biz «FinTech» jáne IT-jobalary arqyly kórsetiletin qyzmetter múmkindigin kúsheıtýimiz qajet.
Taǵy bir mańyzdy másele – tereń óńdelgen ónim eksporty. Memleket basshysy óńdeýshi sektor ózge bızneske qaraǵanda kóbirek qoldaýǵa ıe bolýy keregin kesip aıtty. Iá, eksporttyń ulttyq ekonomıkany jańa deńgeıge shyǵaratyn tetik ekeni belgili. Eksporttyń artqany – jańa jumys ornynyń kóbeıgeni, óndiris kóleminiń artqany. Oǵan qosymsha salyq pen el ekonomıkasyna quıylatyn ınvestısııany qosyńyz.
«Qazaqstannyń eksporttyq-kredıttik agenttigi» AQ el ekonomıkasyn ártaraptandyrý mańyzyn jetik túsinedi. Agenttik Prezıdent tapsyrmasy aıasynda eksportty betke alǵan otandyq kásiporyndarǵa jan-jaqty qoldaý kórsetip, shıkizat emes ónim kólemin arttyrýǵa jaǵdaı jasap otyr. Bıyl Qasym-Jomart Toqaevtyń bastamasymen «KazakhExport» negizinde elimizde eksporttyq-kredıttik agenttik quryldy. Onyń mindeti – eksporttaýshylardy qoldaýǵa úzdik halyqaralyq tájirıbelerdi jáne damyǵan memleketterdiń tájirıbesin paıdalana otyryp, eksportqa qarjylyq qyzmetter kórsetý. Agenttik eksportqa baǵdarlanǵan óndiristerdi qurýǵa ınvestısııalyq kezeńdi qosa alǵanda, eksporttyq sıkldiń barlyq kezeńinde qoldaý kórsetedi. Shet memleketterdiń qarjy ınstıtýttaryn da tartyp, jobalardy qarjylandyrady. Tipti qarjylandyrý qunyna sáıkes jeńildikter alýǵa múmkindik beredi. Mundaı agenttik Ortalyq Azııada buryn-sońdy bolmaǵanyn atap ótken jón. Biz agenttik mártebesin ala otyryp, qoldaý sharalaryn keńeıtip úlgerdik. Aldaǵy ýaqytta Prezıdent qoıǵan mindetterdi júzege asyryp, memlekettik qoldaý sharalary boıynsha jumysty jalǵastyramyz.
Elimiz qazirgi jahandyq ózgerister kezeńinde Memleket basshysy usynǵan damýdyń jańa baǵdaryn ustanyp, ádiletti, adal jáne qaýipsiz qoǵam qurý jolynda aıanbaı eńbek etýi kerek.
Aıan Bektibaeva,
«Qazaqstannyń eksporttyq-kredıttik agenttigi» AQ basqarma tóraǵasynyń orynbasary
