Foto J.Jumabekov
Úzdikter arasynan sýyrylyp shyqqan qos komandanyń kezdesýi áserli sátterge toly boldy. Qazaqstan men Qyrǵyzstan negizgi oıyndy 4:4 esebimen teń aıaqtady. Al qosymsha ýaqytta Qazaqstan quramasy alǵa shyqty.
Oıyn sońynda Erlan Qoshanov chempıondar men barsha qazaqstandyqty kókpar oıynyndaǵy jigerli jeńisimen quttyqtady. Ol aqtyq synda laıyqty qarsylastar, eki baýyrlas halyqtyń myqty oıynshylary kezdeskenin atap ótti. Sondaı-aq Májilis tóraǵasy Memleket basshysynyń bastamasymen elimizde ótip jatqan Dúnıejúzilik kóshpendiler oıyndary kórermenderge jarqyn emosııalar syılaǵan naǵyz sport merekesine aınalǵanyn erekshe atap ótti.
Oıyndar ulttyq sport túrleriniń tartymdylyǵy men biregeıligin, kóptegen baýyrlas halyqty biriktiretin kóshpendilerdiń tarıhynyń rýhyn sezinýge múmkindik berdi. Bul on myńdaǵan sheteldik qonaqtyń qazaqtyń ulttyq mádenıetimen, ádet-ǵurpymen tereńirek tanysýyna da jol ashty.
Aqtyq kezdesýde kókparshylardy qoldaýǵa Májilis delegasııasymen birge Prezıdenttiń kómekshisi Rýslan Jeldibaı men Astana qalasynyń ákimi Jeńis Qasymbek keldi. Jarys bastalar aldynda Erlan Qoshanov dodaǵa sporttyń 21 túrinen qatysyp jatqan qazaqstandyq sportshylarmen áńgimelesip, olarǵa sáttilik pen jeńis tiledi.
V Dúnıejúzilik kóshpendiler oıyndary Astanada 8-13 qyrkúıek aralyǵynda ótedi. Ulttyq sport túrlerinen jarysqa 89 elden komandalar qatysyp jatyr.
