Sýret: ashyq derekkózden
Taıaýda ǵana Memleket basshysy Qasym-Jomart Toqaev Qazaqstan halqyna arnaǵan Joldaýynda shekara mańyndaǵy keden beketteriniń máselesine nazar aýdaryp, olardy damytý jónindegi jumysty qysqa merzimde aıaqtaýdy tapsyrǵan bolatyn.
Mine, osy maqsatta Qarjy mınıstri Mádı Takıev Jetisý jáne Almaty oblystaryna jumys saparymen baryp, «Nur Joly» jáne «Qaljat» keden beketterindegi tyń ózgeristerdi baǵamdap qaıtty. Osy rette mınıstrlik elimizdiń ótkizý beketterinde sıfrly servısterdi júıeli túrde engizýdi myqtap qolǵa alǵanyn aıta keteıik.
Aıtalyq, qazir «Keden» aqparattyq júıesin ázirleý jumysy qarqyn aldy. Bul – otandyq keden salasyndaǵy sıfrly sheshim. Atalǵan júıe «ASTANA-1», «Eksporttyq-ımporttyq operasııalar jónindegi biryńǵaı tereze», «TAIS-2», «JBO» júıelerin almastyrady.
Ozyq júıe kedendik operasııalardyń barlyq kezeńi men qatysýshylarymen ózara is-qımyldy qamtıdy, sondaı-aq ruqsat berý qujattaryn ákelý men alýdan bastap, taýarlar shyǵarylǵannan keıingi baqylaýdy qarastyrady.
«Elimizdiń tranzıttik áleýetin damytý maqsatynda shekaradaǵy ótkizý pýnktterin tolyqqandy jańǵyrtý jalǵasyn tabady», degen Mádı Tókeshuly, keden isin ilgeriletýge arnalǵan ozyq sheshimderdi engizýdi arttyra túsýdi tapsyrdy.
Bul oraıda bıyl Qazaqstan – Qytaı shekarasynda ornalasqan «Nur Joly» avtomobıl ótkizý beketi arqyly 266,5 myń kólik ótkenin aıta ketý kerek. Byltyrǵy kezeńimen salystyrǵanda ósim 2 ese artqan.
Al «Qaljat» avtomobıl ótkizý pýnkti arqyly bıylǵy 8 aıda 30 myńǵa avtokólik ótipti. 2023 jylmen salystyrǵanda ósim 24%-ǵa deıin ulǵaıdy.
Tutastaı alǵanda, jańǵyrtý jumystaryna sáıkes eski ınfraqurylymdy buzyp, jańa ótkizý pýnktterin salý qarastyrylǵan.
Sonymen qatar Astana qalasynda bolatyn bas dıspetcherlik basqarmaǵa keden beketterin baqylaýdy sıfrlandyrý jáne ortalyqtandyrý boıynsha jumystar atqarylyp keledi. Munda salalyq baqylaý qyzmetteri, onyń ishinde shekara qyzmeti de ornalastyrylady.
Atalǵan ózgerister ótkizý beketteriniń ınfraqurylymyn jaqsartyp, damyta túsedi. Shekaradan jaıly ótip, memlekettik baqylaý túrlerin sapaly júrgizý úshin barlyq jaǵdaı jasalady. Kólikterdi qabyldaý 6 ese ulǵaıtylyp, taýarlardy ótkizýdiń barlyq sıklin avtomattandyrý arqyly shekaradan asý ýaqyty 30 mınýtqa deıin azaıa túsedi.
