Sýretti túsirgen – Erlan OMAR, «EQ»
Qusbegiler saıysy bastalmas buryn mandattyq komıssııanyń otyrysy ótip, jerebe tartyldy. Sonyń nátıjesinde saıysty birinshi bolyp elimizdiń qusbegileri bastady. Dúnıejúzilik kóshpeliler oıyndarynda el úmitin arqalap shyqqan 9 qusbegi de – tájirıbesi tolysqan, respýblıkalyq, halyqaralyq saıystarda ysylǵan, el chempıonatynda top jarǵan sańlaqtar. «Búrkit salý» sanatynda Astana qalasynan Serikbek Kúntýǵan, Abaı oblysynan Erzat Baıqadamov, Atyraý oblysynan Arman Qoshqarov sheberligin kórsetti. Túrkistan oblysynan kelgen Dáýren Arshabaı jáne Baǵdat Keýenov, astanalyq Qudaıbergen Raýyluly «Qarshyǵa salý» sanatynan etnosport alamanyna qatysty. Aqmola oblysynan Erlan Kenjetaev, Jambyl oblysynan Baqdáýlet Babajan, Túrkistan oblysynan Ibragım Bazarbaev «Itelgi salýdan» qustarynyń alǵyrlyǵyn synap, barlyǵy da fınalǵa ótti.
Saryarqa tósin dúbirge bólegen Dúnıejúzilik kóshpeliler oıyndaryna elimizdiń qusbegilerinen syrt Qyrǵyzstan, Reseı, Mońǵolııa, Ispanııa, Kanada, Majarstan, Qytaı, Grýzııa jáne Túrkııadan, barlyǵy 42 qatysýshy tirkeldi. Úsh sanatta 18 búrkit, 12 ıtelgi jáne 12 qarshyǵanyń ushqyrlyǵy synaldy. Respýblıkalyq «Qusbegilik» federasııasynyń erejesine saı uıymdastyrylǵan tartystyń jyldan-jylǵa aýqymy da keńeıe tústi. Atadan balaǵa mıras bolǵan, kóshpeli halyqtyń kóne murasy sanalatyn qusbegilik ónerdi jańǵyrtý jumysy qarqyn alyp keledi.
Saıystyń ashylý saltanatynda Qazaqstan Prezıdentiniń keńesshisi – Prezıdenttiń baspasóz hatshysy, Respýblıkalyq «Qusbegilik» federasııasynyń prezıdenti Berik Ýálı mundaı saıystardy ótkizý joǵary jaýapkershilik júkteıtinin atap ótti.
«Dúnıejúzilik kóshpeliler oıyndaryna kóptegen sheteldik qonaqtar kelýi bul dodanyń deńgeıi joǵary ekenin aıqyndaı túsedi. Qusbegilik ónerdi ulttyq sport deńgeıinde dáripteý, damytý mindeti tur. Búgingi etnosport alamanynda ár qurlyqtan kelgen qatysýshylar óz sheberligin kórsetti», dedi Berik Ýálı. Federasııa prezıdenti tóreshiler quramyna saıysqa ádil tórelik etýdi júktedi.
Dúnıejúzilik kóshpeliler oıyndarynda synǵa túsken qusbegilerdiń sheberligin baǵalaǵan tóreshiler alqasynda 6 otandasymyz, Qyrǵyzstannan eki, Mońǵolııa men Reseı Federasııasynan bir tóreshiden bar. Qusbegilik saıysynyń bas tóreshisi Marat Qoıshın saıysty uıymdastyrý erejesi halyqaralyq standartqa saı ekenin atap ótti. Dúbirli dodaǵa kelgen qusbegilerge saıysqa daıyndyǵyn pysyqtaýyna barlyq jaǵdaı jasalǵanyn jetkizdi.
«Dúbirli dodada qusbegiler aldymen qolǵa shaqyrý jáne shyrǵaǵa salý boıynsha synǵa tústi. Saıys óte tartysty ótti. Jergilikti jankúıerler men sheteldik týrısterdiń qıqýy áser etti me, sheteldik keıbir qusbegilerdiń ushyrǵan qyrandary qolǵa shaqyrý synynda da, odan keıin shyrǵaǵa salýda da qatelikke boı aldyrdy. Munda eń aldymen ýaqyt esepke alynady. Iаǵnı tóreshiniń basta degen belgisinen keıin qyranyn ushyrady, qarsy jaqta qolǵa shaqyrǵan ıesine neshe sekýndta jetip, qolyna qonǵany esepke alynady. Al shyrǵaǵa salýda qyrannyń qyraǵylyǵy saralandy», dedi bas tóreshi.
Dúnıejúzilik kóshpeliler oıyndaryna qusbegiliktiń úsh sanaty boıynsha qatysqan komanda quramynda 3 qusbegi, 1 bapker, 1 mal dárigeri boldy. Saıysta 18 jastan asqan eresek qatysýshylar óner kórsetti. Grýzııa elinen qatysqan qusbegi Levanı Doborjıgıshvılı búrkitiniń jatyrqaǵanyn aıtty.
«Birinshi jattyǵýda ushqan búrkitim maǵan qaraı kelmeı, basqa baǵytqa qaıyrylyp ketti. Ekinshi jattyǵýda da jolym bolmady. Bul saıys bizge tájirıbe mektebi boldy. Qusbegilik ónerdiń qıyndyǵy da, qyzyǵy da mol ekenin Astanada ótip jatqan dúbirli dodada tereńdeı sezindim. Fınaldyq saıysqa ótken qarsylastarymnyń barlyǵyna sáttilik tileımin», dedi búrkitshi.
Qusbegilik saıysynyń fınaldyq kezeńi búgin ótip, jeńimpazdar men júldegerler anyqtalady.
