Infografıkany jasaǵan – Amangeldi Qııas, «EQ»
«Otbasy bank» ıpotekalyq baǵdarlamalarǵa birshama ózgeris engizbekshi. Naqtyraq aıtqanda, operator «Otaý» baǵdarlamasynyń sharttary men «Naýryz» baǵdarlamasynyń sharttaryn teńestirýdi josparlap otyr. Klıentterdiń tájirıbesin zerttep, azamattardyń ótinish-tilegin tyńdaǵannan keıin «Otbasy bank» eki baǵdarlamanyń shartyn bir júıege keltirý týraly sheshim qabyldaǵan.
Bank baǵdarlama sharttaryna birqatar ózgeris engizbek. Atap aıtqanda, kezekte turǵan halyqtyń áleýmettik osal toptary úshin «Otaý» baǵdarlamasynyń mólsherlemesi 9%-dan 7%-ǵa deıin tómendeıdi; «Otaý» baǵdarlamasynyń qatysýshylary ótinish bererdiń aldynda depozıt asha alady; Nesıeniń maksımaldy somasy ulǵaıtylady – Astana, Almaty qalalarynda 36 mln teńge jáne basqa óńirlerde 30 mln teńge; Almaty men Astanadan páter alatyndarǵa qoıylatyn tirkeý talaby alynyp tastaldy. Sonymen qatar biryńǵaı baldyq esep júıesi engiziledi. Oǵan sáıkes, depozıt boıynsha syıaqy somasyna ár 1 000 teńge úshin 1 upaı jazylady. Nekege tirkelgen bolsa 5 upaı, balalary bolsa, qosymsha 10 upaı beriledi. Halyqtyń áleýmettik osal toptary mártebesi úshin taǵy 10 upaı qarastyrylǵan. Sondaı-aq jasy 35-ke deıingi azamattarǵa 5 upaı qosylady.
Eki baǵdarlamada bıyl iske qosyldy. Baǵdarlamaǵa qatysý úshin erli-zaıyptylardyń jáne kámeletke tolǵan balalarynyń 5 jyl qatarynan jeke baspanasy bolmaýy negizgi talap bolyp sanalady. Úıge áleýmettik kezekte turǵandar úshin ıpoteka mólsherlemesi 7%-dy quraıdy, ózge azamattar úshin – 9%. Alǵashqy jarna – 20%. Ipotekaǵa nıetti azamattardyń shotynda 1 mln teńge kóleminde jınaqtalǵan depozıti bolýy shart.
