shyǵaratyn zaýyt konveıerinde tolas joq
«AgromashHoldıng» zaýytynyń alyp sehtary óndiris alańynan góri kórermenin kútip otyrǵan kórmege kóbirek uqsaıdy. Jumysy temirmen, tehnıkamen baılanysty sehtardyń shybyn taıyp jyǵylatyn tazalyǵyn ekiniń biri kózge elestete almas edi. «SaryArqaAvtoProm» zaýytynyń japondyq Toyoto Fortuner jáne ońtústikkoreıalyq Ssang Yong Nomad júrdek mashınalaryn qurastyryp jatqan aınalasy atshaptyrym sehyn aralaǵan kisi onyń qýattylyǵyn ásemdikke baǵalaıdy. Birdeı kók tústi jumys kıimin kıip alǵan jumysshy jigitterdiń qoly iske jattyǵyp, mashına qurastyrýdyń qyr-syryn úırenip qalǵany baıqalady. Tehnıkadan aýyly alys adamǵa ne ekeni belgisiz, burandaly temirler jeliniń aıaǵyna kelgende jutynǵan temir tulpar bolyp shyǵady. Ony tekserip, qabyldap alatyn seh sheberi Ulanbek Sársenov eki jyldyń ishinde óziniń biliktiligin de, qyzmetin de ósirdi. Qurastyrý sehynyń bastyǵy Roman Glýshenko maman-jumysshylar qańqasyn qurap almaı, álemdik brendti sapqa qoıýdy meńgere almaıtynyn sezdi. Alǵashqy aılarda sehqa jumysqa kelgender turaqtamady. О́ıtkeni, konveıerdegi jumysty ıgerý ońaı emes. Roman men Ulanbektiń ekeýi de Ońtústik Koreıadaǵy konveıerde jumys isteýdi úırenip, sheteldik mashınalardy qurastyrýdyń búge-shigesin qaldyrmaı úırengen jigitter. Endi olar qostanaılyq jumysshylardy úıretýde. Biz qazir kerekti jumysshylarymyzdy jasaqtap aldyq. Barlyǵy da osy iske júrek qalaýymen kelgen jigitter. Olardyń birazy Qostanaıdaǵy avtomobıl joldary kolledjin bitirgen, birazy tehnıka jóndeý oryndarynan kelgen. Eń bastysy, mashına qurastyrý isine yntyzar, deıdi seh sheberi Ulanbek Sársenov. Onyń ózi de osy iske yntyzardyń biri. Jasynan tehnıkaǵa áýes bolyp ósken ol áskerı boryshyn ótegen soń eshqaıda burylmaı, osynda kelip baǵyn synaıdy. Jumysqa qabyldanǵan oǵan qazir Qostanaıdaǵy Z.Aldamjar atyndaǵy tehnıkalyq-áleýmettik ýnıversıtetinen alǵan bilimi de jaqsy kómek boldy. Joǵary biliminiń arqasynda kompıýterdiń qulaǵynda oınaıdy, óte jetik. Ulanbek jumysshylaryn Toıoto mashınasynyń qasyna jınady. Japondyq brendti sapqa qoıǵan osy jigitterdi biz sýretke túsirip aldyq. Seh sheberi jarty jyldyń ishinde jumysty úıirip alǵan jigitteri úshin keýdesin maqtanysh sezimi kerneıtinin de jasyrmady. Serjan Ahmetovten, Vladımır Savıchevten, Nurbol Ysqaqovtan seh sheberiniń úmiti mol. О́te tııanaqty jastar. Al qurastyrý sehynyń bastyǵy Roman Glýshenko Ulanbektiń maqtanyshyn tolyq qoldaıdy eken. Sebebi, ol adam balasynyń istegen isi talpynǵannyń qolynan keledi dep biledi. – Bizdiń «AgromashHoldıngtiń» óndiris alańy Ońtústik Koreıadaǵy brend mashınalar qurastyrylyp jatqan zaýyt sehtarynan esh kem emes. Tipti, artyq der edim. О́ıtkeni, birinshiden, bizdiń sehtarymyz óte keń, bıik, jaryq. Jabdyqtarynyń barlyǵy jańa, syrdyń ıisi shyǵyp tur. Al Ońtústik Koreıa sehtary tarlaý, jabdyqtary da jańa emes ekeni kórinip tur. Al bizdiń mamandar áli-aq olardyń qataryna jetip alady, – deıdi Roman Vasılevıch. Bárin aıt ta, birin aıt, Qostanaıdaǵy «SaryArqaAvtoProm» mashına qurastyrý zaýyty Qazaqstandaǵy osy salanyń biregeı nysany. О́ıtkeni, mashına jasaý salasyndaǵy ózge zaýyttardaǵydaı emes, mundaǵy jumystardyń 40 paıyzynan astamy qostanaılyq mamandar men jumysshylardyń qolynan ótedi. Alyp sehta jumystar negizinen úlken úsh bólikke bólinedi. Aldymen mashına qoraby bir sehta dánekerlenedi, ekinshi sehta arnaıy jabdyqtarmen boıalady, sosyn baryp eń kúrdeli jumys úlken sehta bastalady, qurastyrylady. Ulanbektiń jigitteri osy qurastyrý isiniń ár tetigin jatqa biledi. Zergerlik jumystan artyq-kemi joq. Jigitterdiń kúnine on eki mashınany sapqa qoıýǵa shamalary jetedi. – Mashınany sapqa qoıǵannan ony synaqtan ótkizý úderisi ońaı emes. Alǵashqy kezde mashınalardyń aqaýy da shyǵyp júrdi. О́ıtkeni, ol kezde jigitterdiń qoly áli de jattyǵa qoımaǵan ýaqyt qoı. Ondaı mashınalardy qaıta sehqa ákelip, qate ketken jeriniń barlyǵyn jumysshylar men mamandar talqylaıtynbyz, qaıta kórsetetinbiz. Bir jaǵynan olardy mundaı jumys tártibi pysyta tústi, – deıdi Roman Glýshenko. Qazir sehta aqaýly mashınalar jóninde sóz tipti az bolady. Sonda da mashına sehta da, syrttaǵy jolda da synaý úderisterinen ábden tııanaqty ótken soń ǵana, satý salonyna qoıylady. Mysqaldaı min tabylmaýy tıis. Qazaqstandyq Ssang Yong Nomad ta, Toyoto Fortuner de jutynyp turady. «SaryArqaAvtoProm» jaýapkershiligi shekteýli seriktestigine 2013 jyly Elbasynyń «Indýstrııalandyrý kóshbasshysy» sanatyndaǵy «Altyn sapa» syılyǵyn alyp bergen osy sehtan shyqqan qarlyǵash Ssang Yong Nomad bolatyn. Ol Eýrazııalyq ekonomıkalyq odaq elderine shyǵarylady. Al Toyoto Fortuner aldymen qazaqstandyq naryqty qamtamasyz etýge baǵyttalǵan. О́tken jyly jazda Qostanaıda qurastyrylǵan Toıoto mashınasynyń tusaýkeseri bolǵanda Elbasy Nursultan Nazarbaevtyń ózi kelip, álemdik brend qos tulpardyń qorabyna óziniń qoltańbasyn qaldyrdy. Aınaldyrǵan bes jyldyń ishinde Qazaqstanda mashına qurastyrý isiniń ortalyǵy bolyp úlgergen Qostanaıdaǵy «AgromashHoldıng» zaýytynda mashına qurastyrý isiniń mýzeıi ashylady degen boljam bar. Elbasynyń qoltańbasy bar qos tulpar sol mýzeıdiń basty jádigeri bolaryna sóz joq. Olar qazir saqtaýly tur. Árıne, osy sehtyń alǵashqy basshylary, alǵashqy mamandary men jumysshylary – Ulanbek pen Roman bastaǵan jigitterdiń sýreti de mýzeıden oryn alar bálkim. Qazirde respýblıkadaǵy mashına shyǵarý óndirisiniń kóleminde Qostanaı oblysynyń úlesi 17 paıyzdy quraıdy. «SaryarqaAvtoProm» zaýyty 2014 jyldyń kókteminen bastap 500-ge tarta Toıotony sapqa qoıdy. Elimiz óndirisindegi jańa sala – mashına qurastyrýdyń kólemi 2010 jyldan 2013 jylǵa deıin 90 ese ósken. Mysaly, 2010 jyly 77 mashına qurastyrylsa, 2013 jyly bul san 7 myńnan asyp ketken. Aldaǵy ýaqytta jigitterdiń qoly kánigi zergerdeı mashına qurastyrý isine eptele, úırene túsedi. Zaýyt tolyq qýatyna kóshkende jylyna 3000 Toıotony usynatyn bolady. Dalany jol tańdamaıtyn tulparlar kezedi. Názıra JÁRIMBETOVA, «Egemen Qazaqstan». QOSTANAI.
