Bala quqyqtary jónindegi aımaqtyq ýákil Sáýle Shakenevanyń aıtýynsha, oqıǵa 11 qyrkúıek tústen keıin dúkenniń janynda bolǵan.
Altynshy synyp oqýshysy eki qurdasyn jınalmaly pyshaqpen jaraqattaǵan.
Olar bul týraly eshkimge aıtpaı, sabaqqa qatyspastan úıge ketken. Keıin ekeýi de dárigerge júginýge májbúr bolypty.
– Bir balanyń sol jaq jambasynda pyshaqpen kesilgen jaraqat, ekinshisinde sol jaq jambasta soǵylǵan jara boldy. Medısınalyq kómek kórsetkennen keıin oqýshylar ambýlatorııalyq emdeýge jiberildi, – dep naqtylady Densaýlyq saqtaý basqarmasy.
Kelesi kúni jábir kórgen balalardyń ata-anasy mektep ákimshiligine habarlaǵan, olar óz kezeginde bilim bólimi men polısııany qulaǵdar etken.
Polısııa departamenti qylmystyq is qozǵalmaǵanyn jetkizdi, óıtkeni oqýshy áli 14 jasqa tolmaǵan. Onyń is-áreketine ata-anasy jaýapty.
– Kúdikti qylmystyq jaýapkershilikke tartatyn jasqa jetken joq. Osyǵan baılanysty atalǵan fakti boıynsha qylmystyq is qozǵalmady. Zańdy ókil balany tárbıeleý, quqyǵyn qorǵaý jáne qaýipsizdigin qamtamasyz etý jónindegi mindetterin oryndamaǵany úshin ákimshilik jaýapkershilikke tartyldy, – dep túsindirdi.
Sáýle Shakeneva zardap shekken oqýshylar sabaqqa qaıta oralǵanyn, olardyń densaýlyǵyna eshqandaı qaýip joq ekenin aıtty.
Pyshaqtaǵan oqýshy endi úıde oqıdy. Mundaı sheshim kámeletke tolmaǵandar isteri jáne olardyń quqyǵyn qorǵaý komıssııasynyń kezekten tys otyrysynda qabyldandy.
