Astanada qazaq-nemis mektebin salý jobasy Qazaqstan Prezıdentiniń 2023 jyly Germanııaǵa sapary aıasynda qolǵa alynǵan. Memleket basshysy Qasym-Jomart Toqaev eki el arasyndaǵy yntymaqtastyqtyń aıshyqty belgisine aınalatyn mektep salý múmkindigin qarastyrýdy tapsyrǵan edi.
Joba «Vozrojdenıe» Qazaqstan nemisteri birlestigi men «Samuryq-Qazyna» ulttyq ál-aýqat qory, Astana qalasynyń ákimdigi, Oqý-aǵartý mınıstrligi jáne Germanııa standarttary boıynsha bilim berý baǵdarlamalaryn ázirleýge jáne engizýge kómektesetin Germanııa Federaldy syrtqy ister mınıstrligi qoldaýymen júzege asyrylady. Mektep 600 otandyq oqýshyǵa nemis tilinde halyqaralyq bilim beretin sheteldegi nemis mektepteriniń jahandyq jelisiniń bir bóligine aınalady.
Astanadaǵy qazaq-nemis mektebi Germanııanyń bilim standarttary boıynsha oqytatyn Orta Azııadaǵy alǵashqy mektep bolady. Oqý baǵdarlamasy túlekter Qazaqstanda da, Germanııada da moıyndalǵan attestat ala alatyndaı etip qurylǵan. Bul olarǵa qosymsha daıyndyq jáne qabyldaý emtıhandarynsyz Germanııanyń joǵary oqý oryndarynda oqýdy jalǵastyrýlaryna múmkindik beredi.
Joba bastamashylarynyń aıtýynsha, qurylysty 2025 jyldyń sońyna deıin aıaqtaý josparlanyp otyr. Al 2026 jyly mektep alǵashqy oqýshylarǵa esigin aıqara ashady. Atalǵan joba Qazaqstanda bilim sapasyn arttyrýǵa ǵana emes, eki el arasyndaǵy mádenıet jáne bilim salasyndaǵy baılanysty nyǵaıtýǵa da yqpal etpek.
Aıta keteıik, joba «Samuryq-Qazyna» AQ kompanııalar tobynyń biryńǵaı qaıyrymdylyq operatory – «Samruk-Kazyna Trust» qory arqyly qarjylandyrylady.
