Sýret: ru.freepik.com
Bıyl aqpan aıynda Ulttyq bank tóraǵasy Tımýr Súleımenov jyl sońyna deıin biryńǵaı QR-kod tólem júıesi iske qosylatynyn aıtqan edi. Tipti bas bank ekinshi deńgeıli bankterdi osy júıege qosylýǵa mindetteýi múmkin dep eskertken-tuǵyn. Bankter bas tartqan jaǵdaıda Ulttyq bank shara qoldanbaq. Sebebi bul júıe – ekonomıkalyq qaýipsizdiktiń quramdas bóligi. О́zgeriske naryqtyq úderis túrtki bolyp otyr. Sátti júzege asyrylǵan jaǵdaıda, bankterdegi tólem júrgizý edáýir jeńildemek.
Jaıly bastama jaqsy jańalyq bolǵanymen, daıyndyǵy birshama ýaqytqa sozyldy. Endi Ulttyq bank muny 2025 jyldyń birinshi jartysyna josparlap otyr. Bul týraly Ulttyq tólem korporasııasynyń tóraǵasy Bınur Jálenov aıtty.
«Bıyl bankaralyq aýdarymdar múmkindigin telefon nómiri boıynsha, al kelesi jyldyń birinshi jartysynda biryńǵaı QR arqyly qosamyz degen jospar bar. Osy baǵytta jumys júrip jatyr», dedi ol.
Keshe Astanada ótken «Jańa álemdegi halyqaralyq qarjy júıesi» konferensııasynda osy týraly tolyq málimet suradyq. Sonda QR-kodty paıdalaný kezinde komıssııa bolmaıtynyn, sondaı-aq júıeniń jyl sońyna deıin nege daıyn bolmaǵanyn túsindirdi.
– Biz júıeni bıyl iske qosamyz dep aıtqan edik. Qazir júıe bar, tek bankterdi qosý úderisi júrip jatyr. Ár banktiń óz beklogi, ózindik damý joly baryn esten shyǵarmaǵan jón. Osy áreketterdiń barlyǵyn jedeldetýge jumys istep jatyrmyz. Bıyl telefon nómirleri boıynsha aýdarma qyzmeti iske qosylady jáne QR-kodty synaqtan ótkizbekpiz. Qazir tarıf máselesi talqylanyp jatyr. Bul qoldanystaǵy sheshimderge qaraǵanda tıimdirek bolady. Biraq olardyń shottary arasynda tutynýshylarǵa komıssııa bolmaıdy. Biryńǵaı QR-kodty ózimizdiń ázirleýshiler jasap jatyr, – dedi B. Jalenov.
Sonymen qatar ol bárin aldymen tekseristen ótkizýdiń mańyzyna erekshe toqtaldy. Sebebi bul halyqtyń aqshasy deıdi. Eger qandaı da bir qatelik bolsa, adamdar aqshasyn joǵaltýy múmkin. Sol úshin de sapaǵa basa mán berý kerek.
