Ýádede turǵan Úkimet

Sóıtip, Memleket basshysy Q.Toqaevtyń «esh­kim de baspanasyz qal­maıdy, bárińizge úı beriledi» degen ýádesi tolyqtaı orynda­lyp otyr. Sýyq túskenshe qurylys bitpeı qalyp, qara jelde dalada qalamyz ba degen adamdar­­dyń kúdikteri tolyq seıildi. Prezı­dent bergen tapsyrmany Úkimet oryndap, demeýshiler qarajat bólip, jergilikti bılik iske asyr­ǵan bataly iske qalyń kópshilik shyn kóńilden razy. Osynyń ózi táýelsiz elimizde birlik, ynty­­maq, uıymshyldyq bolsa árdaıym alyn­baıtyn qamal joq ekenin kór­set­kendeı boldy.

Jańadan salynǵan 700 úı­den basqa oblysta 1 394 páter satyp alynyp, zardap shekkenderge berildi. Sondaı-aq 1 899 úıge kúrdeli jón­deý jasaldy. Jek­sen­bi kúni jańa úılerdiń kiltin tap­syrǵan sal­tanatqa Premer-mınıstrdiń oryn­basary Qanat Bozymbaev, oblys ákimi Ǵaýez Nur­muhambe­tov, bar­lyq demeýshiler, qu­rylys kom­pa­nııalarynyń basshylary qatysty.

Altyn kúzdiń jaıdary kú­nin­de úı alǵan jandardyń kó­ńil­deri shat, qýanyshtarynda shek bol­ǵan joq. «Japa shekken tur­ǵyndarǵa shydamdylyq kórsetip, qıyn jaǵdaıǵa tótep bergenine rıza­­shylyǵymdy bildiremin. Jańa úı­lerdi salýǵa, qalaǵan jandar­ǵa ekinshi naryqtan úıler satyp alý­ǵa, kúrdeli jóndeý jasaýǵa qara­jat bólgen barlyq otandyq bıznes ókiline, atap aıtsaq, «Qazaqstan hal­qyna» qorynyń basqarma tór­aǵasy Bolat Jámi­shevke, «Kazakh­mys» korporasııasy dırektor­lar keńesiniń tóraǵasy Edýard Ogaı­ǵa, «Kaspi» kompanııasy dırek­torlar keńesiniń tóraǵasy Vıacheslav  Kımge, «KAZ Minerals Manage­ment» dırektor­lar keńesiniń tór­aǵasy Oleg Novachýkke ­alǵys aıtamyn. Sizderdiń kómekte­rińiz bol­masa biz mundaı aýqym­dy qurylys­­ty 3,5 aıda bitire almas edik», dedi Premer-mınıstr­diń orynba­sary Qanat Bozymbaev óziniń quttyq­taý sózinde.

Oblys ákimi Ǵaýez Nur­mu­ham­­betov te demeýshilerge ys­tyq yqylasyn bildirdi. Quttyq­taý sózinde ol qurylys ju­mys­­tary únemi baqylaýda bolyp, Pre­zı­denttiń tapsyrmasyn oryn­daýǵa bar­lyq múmkin bol­ǵan sharalar jasalǵanyn málim etti. «Endi mine, sizderdiń qýanysh­taryńyz­dy kórip ózimiz de qatty qýa­nyp turmyz», dedi ol. Demeýshiler ara­synan sóılegen Vıacheslav Kım ózderiniń de jaýapkershilikti jete sezingenderin jetkizdi. «Bizge qarajat bóldirý de ońaı bolǵan joq. Sol aqshanyń tıimdi turǵyda iske asqanyn, halyqtyń sýyq tús­peı jyly úıge kirip alýyn oılap, qatty alańdap júrdik», dedi ol.

Jańa úı alǵandardyń qata­rynda Álıma Jamanquzova da bar. «Biz kúzdiń qara sýyq soǵa bas­taǵannan ýaıymǵa batyp edik. Alaıda jergilikti bılik únemi úmitimizdi úzbeı, úıdiń jaqynda daıyn bolatynyn aıtyp, kóńi­li­mizdi demdep otyrdy. Aqyry mine, sýyq túspeı jańa úıimizge kirip aldyq. Jeri de keń eken, men ózim baqsha egýdi jaqsy kóretin adammyn. Prezıdentke, úkimetke aıtar alǵy­sym sheksiz», dedi ol qyzyl len­taǵa baılanǵan kiltti alyp turyp.

Vadım Bedrensev turǵyn úı­­lerin sý basqan «Zarechnyı» ken­tinde turyp kelgen eken. «Úıim­di óz qolymmen salyp edim, adam­ǵa kún­delikti kerektiń bárin de ja­sa­ǵanmyn. Monsham qandaı edi. So­nyń bárin bir kúnde sý basyp, tal­qan­dap ketti. Qatty kúızeliske tústim. Ja­sym alpystan asqanda ne isteı ala­myn? Áıteýir, Qudaıǵa shú­kir, úki­met dalada qaldyrǵan joq. Mine, jar­qyraǵan jańa úı salyp berip otyr. Qýanyshymdy jasyra almaı tur­myn. Osy jumys­tar­dyń basy-qa­synda júrgen barsha qamqor jan­­darǵa myń alǵys», dedi zeınetker.

Bul aýdanǵa jańadan salynyp jatqan 90 oryndyq balabaqsha­nyń qurylysy da jaqynda aıaqtala­dy. Onyń qurylysyn «Kaspi» kom­panııasy qarjylandyrǵan, ashylýy qazan aıyna belgilengen. Sonymen qatar osy aýdanda 600 oryndyq mektep salý da jos­parlanǵan. Joldar tegis asfalt­tanyp, abattandyrý jumysy da júrgizilmek. Qazir qarasa kóz toımaıtyn, qazdaı tizilgen birkelki ádemi úılerden jarqyn-jarqyn qýanyshty daýystar, kóńildi áýen­der estilip, turǵyndar qonys toıy­na kirisip ketken.

PETROPAVL