Ekologııalyq tárbıeniń orny erekshe

Osy Joldaýdan kóńilge toqyǵan dúnıem – Prezıdenttiń tárbıe baǵytyndaǵy aıtqan sózderi. Elimizdi órkendetý baǵytyndaǵy jospar-jobalardan bilim salasy da Memleket basshysynyń nazarynan tys qalmady. El bolashaǵy jastardyń qolynda ekeni aıtpasa da túsinikti, sol sebepti búgingi óskeleń urpaqqa ulttyq tárbıemizdi sińirip, quqyq buzýshylyqqa qarsy rýhta tárbıeleý jaǵyna kóp kóńil bólindi. Oǵan qosa memleket tarapynan jastarymyzdy qoldaý, áleýmettik jaǵynan osal topqa jatatyn otba­sy máselesi de memlekettik saıa­sattan shet qalmaıtynyn jetkizdi, Ulttyq qordan bala­lar­dyń bolashaq ıgiligine dep qarjy berý bastamasyn jandandyrýǵa mán berildi.

Buǵan qosa Memleket basshysy mektepterdiń jumysyn jaqsartý sharalaryn qolǵa alǵan jón ekenin de atap ótti. Bul rette muǵalimderdiń biliktiligin arttyrýǵa, áleýmettik mártebesin kóterýge kóńil bólýdi óte oryndy aıtty.

«Ustazdar – ulttyń zııatkerlik qýaty. Olar bilimdi urpaq tárbıeleý arqyly elimizdiń órkendeýine jol ashady. Úzdik oqý baǵdarlamasy, zamanaýı mektepter, ozyq bas­qarý júıesi bolsa da, ustaz bilikti bolmasa, onyń bári beker ekeni anyq. Sondyqtan pedagogıkalyq joǵary oqý oryn­daryna talapty, qabiletti jastardy qabyldaýǵa basa mán berý kerek. Jalpy, bul baǵyttaǵy jumystyń betaly­sy jaqsy, ony jalǵastyrý qajet», dep Memleket basshysy bilim salasyna barynsha kóńil bólinip otyrǵanyn ańǵart­ty.

Al tutas halyqty birlikke uıystyra alǵan berekeli bas­tama «Taza Qazaqstan» jalpyulttyq ekologııalyq aksııasy aıasynda elimizde kóktemnen beri kóp sharýa atqaryldy. Prezıdent Joldaýda atalǵan aksııaǵa birneshe aıdyń ishinde 3 mıllıonǵa jýyq azamat qatysqanyn atap ótti. Myńdaǵan úıdiń aýlasy tazartylyp, 1 mıllıon tonnadan asa qoqys jınalypty. Bul – óte jaqsy kórsetkish. Áli de bolsa aksııany toqtatpaı, osy rýhta jalǵastyra bergen abzal. Rasynda, bul bastama bizde jańa mádenıet, jańa qoǵamdyq etıka ornyǵyp kele jatqanyn kórsetedi.

«Halqymyzdyń boıynda jaqsy qasıetter óte kóp. Mysaly ózge elder bizdi qonaqjaı, aqkóńil halyq retinde biledi. Dál solaı tazalyq jurtymyzdyń qanyna, janyna sińgen qasıet bolýy kerek», degen Memleket basshysy «Taza Qazaqstannyń» aımaqtarda sapaly júzege asýyna ákimder tikeleı jaýapty ekenin shegelep aıtty. Dese de ákimdiktiń úılestirý jumystaryna jumylyp, aınala tóńirektiń taza bolýyna bir kisideı atsalysý – árbir adamnyń azamattyq boryshy. Tazalyq jınaǵan jerde emes, ony saqtaǵan jerde bolatyny, ata-babamyzdan yqylym zamannan beri ónege-ósıet bolyp kele jatqan qaǵıda emes pe edi?

Qoryta aıtsaq, Prezıdenttiń tazalyq mádenıetin qalyptastyryp, «Taza Qazaqstan» aksııasyn odan ári jandandyryp, tabıǵatqa degen janashyrlyǵymyzdy, tazalyqqa degen jaqyndyǵymyzdy da bizdiń qonaqjaı­ly­ǵy­myzben qatar atalar qasıetke aınaldyrý týraly oıy óte quptarlyq. Árıne mekteptiń oqý baǵdarlamasynda óskeleń urpaqty tazalyq mádenıetine baýlý isi kende qalyp jatqan joq. Túrli aksııalar, tárbıe saǵattary ótkizilip turady. Oqýshylardy mundaı memleketshildik baǵytta tárbıeleıtin úlken bastamalardan barynsha tys qaldyrmaýǵa tyrysamyz.

Svetlana ISAEVA,

muǵalim

Taldyqorǵan