Qaraǵandyda polıseı atyn jamylǵan kúdikti top ustaldy

ASTANA. 15 maýsym. Qaraǵandyda ózin polısııa qyzmetkeri dep tanystyryp, aqsha bopsalaýmen aınalysqan 29 jastaǵy er adam men onyń sybaılastary ustaldy. Bul týraly «QazAqparat» habarlady. Jedel-izdeý sharalarynyń barysynda oblystyq ishki ister departamentiniń jeke qaýipsizdik basqarmasynyń qyzmetkerleri aqsha bopsalaýmen aınalysqan jalǵan polıseıdi, sondaı-aq onyń sybaılastaryn ustady. Top basshysy buryn sottalǵan 29 jastaǵy azamat bolyp shyqty. Ol aldyn – ala jurttan aqsha bopsalaý kestesin quryp otyrǵan. Tarqata aıtqanda ol sybaılastarynyń kómegimen áleýmettik jelilerdiń birinde boıjetkenniń atynan paraqsha quryp, onda er adamdarmen hat almasyp, jynystyq qatynastarǵa túsýdi usynǵan. Oblystyq ishki ister departamenti baspasóz qyzmetiniń málimetinshe, bopsalaýshylardyń qarmaǵyna Temirtaý qalasynyń 38 jastaǵy turǵyny túsken. Ol jańadan tanysqan boıjetkenmen kezdesý úshin jaldamaly páterge kelgen. Dál sol mezette páterge ózderin quqyq qorǵaý qyzmetkerimiz dep tanystyryp, jalǵan qyzmettik káýlik kórsetý arqyly, ony kámelettik jasqa tolmaǵan qyzǵa azǵyndyq áreket jasady dep aıyptaǵan. Tipti uıymdasqan top jalǵan kýágerlerdiń kózinshe páterge tintý júrgizip, jábirlenýshini qylmystyq jaýapkershilikten bosatý úshin qomaqty qarjy talap etken. Bopsalaýshylardyń aldaýyna kónip qalǵan ol 60 myń teńge bergen. Alaıda, kúdiktiler bul qarajatqa qanaǵattanbaı taǵy 5 myń dollar suraǵan. Aıta keteıik, jábirlenýshi oblystyq ishki ister departamentiniń jeke qaýipsizdik basqarmasyna ótinish jazǵan. «Kúdikti aqshany berý kezinde ustaldy. Qazirgi ýaqytta bir top adamdarǵa qatysty qylmystyq is qozǵaldy. Qazir tergeý amaldary júrgizilip jatyr. Ustalǵandardyń barlyǵy ýaqytsha qamaýǵa alyndy», – dep oblystyq ishki ister departamentiniń baspasóz qyzmeti málimet taratty. Talǵat Raıymbek. Derek, sýret: «QazAqparat».