Sýret: gov.kz
Jıynǵa Ǵylym qorynyń tóraǵasy Kamıl Aqatov, tóraǵanyń orynbasary Álııa Sembaeva, DFG halyqaralyq baılanystar bóliminiń basshysy Iıorg Shnaıder, DFG-nyń Shyǵys Eýropa jáne Ortalyq Azııa jónindegi mamany Elıza Brekkefelt, DFG-nyń ınjenerlik ǵylymdar jónindegi baǵdarlamalyq dırektory Kozıma Shýster, sondaı-aq CASIB Almatydaǵy keńsesiniń basshysy Pıter Lıbelt qatysty.
Ǵylym qory men Nemis zertteý qory ókilderiniń atalǵan kezdesýde jańa ǵylymı-ınnovasııalyq kollaborasııalardy qurý perspektıvalaryn jáne qazaqstandyq ǵalymdardy birlesken ǵylymı jobalarǵa tartý baǵdarlamasyn júzege asyrý bastamasy jónindegi oı-pikirlerin ortaǵa saldy. Osyǵan qosa otandyq ǵalymdarǵa qatysty tehnologııalardy kommersııalandyrý salasyndaǵy múmkindikter, sondaı-aq nemis áriptesterimen yntymaqtastyqtyń jańa nysandary talqylandy.
DFG Ortalyq Azııada iske asyrylatyn «Qoldanbaly ǵylymdar ýnıversıtetterindegi zertteýlerge arnalǵan jeli» (UDIF-HAW) bastamasyn usyndy. Bul baǵdarlama qoldanbaly ǵylym ýnıversıtetteri men óńirdiń ǵylymı ınstıtýttary arasyndaǵy halyqaralyq yntymaqtastyqty kúsheıtýge baǵyttalǵan.
Ǵylym qorynyń habarlaýynsha, Nemis zertteý qorynyń ókilderi ǵylymı yntymaqtastyq quraldaryn paıdalaný tájirıbesin bólisip, atalǵan qory tarapynan Ortalyq Azııa men otandyq ǵalymdarǵa qoljetimdi qarjylandyrý múmkindigi usynyldy. DFG jyl saıyn búkil álemde, onyń ishinde Ortalyq Azııa elderinde shamamen 30 000 ǵylymı jobany qarjylandyrady. Qordyń jyldyq bıýdjeti 4 mıllıard evrodan asady. Ǵylym qory «Horizon Europe» baǵdarlamasy aıasynda Germanııanyń zertteý uıymdarymen belsendi baılanys ornatyp otyr, bul qazaqstandyq ǵalymdardyń halyqaralyq jobalarǵa qatysýyna qosymsha múmkindikter ashady.
