Sýretti túsirgen – Erlan OMAR, «EQ»
Bıyl Qyzyljar óńiriniń dıqandary 4,4 mln gektarǵa astyq sińirgen, sonyń 3,3 mln gektary – dándi daqyldar. Egin oraǵyna oblysta 7 myńnan artyq kombaın shyǵarylǵan. Astyq qabyldaıtyn 46 elevator (syıymdylyǵy – 3,2 mln tonna) bar. Olardan basqa 3,7 mln tonna astyq qabyldaı alatyn 332 astyq qabyldaý pýnkti bar. Dıqandar lıtri 250 teńgege arzandatylǵan janar-jaǵarmaımen tolyq qamtylǵan.
Aýyl sharýashylyǵy basqarmasynyń sońǵy málimetine qaraǵanda, 1 mln 210 myń gektar jerdiń astyǵy orylyp, bastyrylǵan. Alynǵan astyq kólemi 2 mln 100 myń tonnadaı. Astyq shyǵymdylyǵy orta eseppen gektarynan 17,1 sentnerden aınalyp jatyr. Byltyr bul ýaqytta 1 mln 370 myń gektar alqaptyń astyǵy orylyp alynǵan edi. Alynǵan astyq kólemi 1 mln 400 myń tonnadaı bolǵan. Gektar shyǵymdylyǵy ol kezde 10,6 sentnerden aınalǵan.
Qyzyljar aýdanynda 7,5 myń gektar jerge egin salatyn, Jomart Omarov basqaratyn «JJ Trade group» JShS-na soǵyp, oraq barysyn bildik.
«Bıylǵy egin bitik shyqty, biraq alý qıynǵa aınalyp tur. Kóp jaýǵan jańbyrdan aramshóp te qaptap ketti. Ony qurtý – qosymsha jumys. Bizdiń egis alqabymyzdyń shyǵymdylyǵy ártúrli. Eń nashar degen alqaptan gektaryna 20 sentnerden alyp jatyrmyz. Sonymen birge 25–30 sentnerge deıin astyq ósken alqaptar bar. Sonda orta eseppen 25 sentnerden aınalatyn shyǵar. Bizge eń bastysy aýa raıy qurǵaq bolyp, endi bir 10 kúndeı tursa dep tileımiz», dedi.
Dıqannyń aıtýynsha, qazir astyq qabyldaý oryndary aýzy-murnynan shyǵyp, mashınalarǵa tolyp tur. Astyqtyń ylǵaldylyǵy da joǵary, sońǵy alynǵan astyq qana birshama qurǵap, 15 paıyzǵa deıin túsken. Aldyńǵy tapsyrylǵandar
20–25 paıyzdyq ylǵaldylyqpen ótken.
Tájirıbeli dıqan bıylǵy astyq baǵasy da 3-synypqa 80 myńnan aspaıtyn shyǵar dep oılaıdy. «Ádette astyq kóp bolǵan jyldarda baǵa tómendeıdi ǵoı. Ázirge azyq-túlik korporasııasy bıdaıdyń baǵasyn naqty belgilegen joq, biraq 80 myń teńgeniń shamasynda bolar dep oılaımyn», dedi.
Aýyl sharýashylyǵy basqarmasy ázirge astyq qabyldaý kásiporyndaryna 370 myń tonnadaı astyq jetkizilgenin málimdedi. Sonyń 226 myń tonnadaıy – bıdaı. Sonyń ishinde jumsaq suryptysy – 210 myń tonnadaı. Sapasy úshinshi synypqa sáıkesteri – 93,5 myń tonna. Bul – barlyq bıdaıdyń 44,3 paıyzy. Al tórtinshi suryptaǵylar – 97,9 myń tonna, 46,4 paıyz. Qazir 39 astyq qabyldaý kásiporny jumysqa tolyq kirisken.
Soltústik Qazaqstan oblysy
