D tobynda toptyq kezeń matchtaryn ótkizgen jigitter aldymen eki dúrkin álem chempıony Ispanııa quramasymen teń tústi (1:1). Odan keıin Lıvııa quramasyn 4:1 esebimen utty. Toptaǵy sońǵy saıysty Jańa Zelandııa oıynshylaryna qarsy ótkizgen jigitter macht boıy erkin qımyldap, 10:0 esebimen aıqyn basymdylyqpen jeńdi. Osy matchta Arnold Knaýb enshisine 5 gol jazyp, álem chempıonatynyń tarıhynda sportshylarymyzdyń arasynan alǵash bolyp penta-trık oryndaǵan surmergen atandy. Álemdik dodada 2016 jyldan beri penta-trık tirkelmegen edi. Arnold osy statıstıkanyń kóbesin sógip, seńge qozǵaý saldy. Aıtpaqshy, ulttyq qurama dál mundaı iri eseppen sońǵy ret 2016 jyly Solomon araldary quramasyn (esep 10:0) utqan-dy.
Portýgalııa quramasymen bizdiń oıynshylar buǵan deıin álem chempıonatynyń tartysynda eki ret kezdesti. 2000 jyly ótken álem chempıonatynyń toptyq kezeńinde bizdiń qurama portýgaldyqtarǵa 2:6 esebimen jol berdi. Ekinshi ret 2021 jyly ótken álem chempıonatynyń jartylaı fınalynda toqaılasty. Negizgi ýaqytta 1:1 esebi tirkelip, ekstra taımda Dýglastyń golynan keıin 2:1 esebimen alǵa shyqqan jigitter matchtyń túgesilýine eki mınýt ýaqyt qalǵanda qorǵanysty bosańsytyp, portýgaldyqtar tarazy basyn teńestirip ketti. Odan keıin penaltı serııasynda da olar 4:3 esebimen ústem tústi.
Ese qaıtaratyn sát keldi. Álem chempıonatynyń tartysynda eki ret basym túsken Portýgalııa quramasyn bizdiń jigitter 2015 jyly Eýropa chempıonatyna irikteý dodasynda 3:1 esebimen jeńgen. Endeshe, álem chempıony eken dep, ataǵynan qaımyǵý esh qısynsyz. Eger Rıkardo Kaka shákirtteri Portýgalııa quramasyn jeńse, onda shırek fınalda Argentına – Horvatııa tartysynyń jeńimpazymen sheberlik synasady.
2021 jyly Lıtvada ótken álem chempıonatynda Portýgalııa quramasy fınalda Argentına oıynshylaryn 2:1 esebimen utqan edi. Bizdiń jigitter qola júlde úshin tartysta Brazılııa quramasynan 4:2 esebimen utylyp, 4-oryndy mise tutty. «Álem chempıonatyna qatysýshy barlyq qurama da tegeýrindi. Dese de olardyń ataǵyn, abyroıyn salmaqtap, qaımyǵý bizge jat. Elge ǵalamdyq alamannyń bir júldesin tartý etýge barymyzdy salamyz», dedi bas bapker Rıkardo Kaka.
Ústel tennısi: Azııa alamany Astanada ótedi
Astanada 6-13 qazan aralyǵynda ústel tennısinen HHVII Azııa chempıonaty ótedi. Qurlyqtyń tańdaýly sheberleri baq synaıtyn dodaǵa 26 memleketten 210 sportshy qatyspaq. Bahreın, Gonkong, Úndistan, Iordanııa, Iran, Iemen, Qatar, Qytaı, Taıpeı, KHDR, Qyrǵyzstan, Malaızııa, Maldıv, Mońǵolııa, Nepal, Oman, Pákistan, Saýd Arabııasy, Sıngapýr, Taıland, О́zbekstan, Fılıppın, Shrı-Lanka, Ońtústik Koreıa, Japonııa jáne Qazaqstan tennısshileri tartysqa túsedi.
Elorda tórinde qurlyq alamanyna qatysatyn sańlaqtardyń arasynda komandalyq syndy Olımpıada chempıony atanǵan, álem chempıonatynda tórt márte top jarǵan qytaılyq Van Chýsın, Olımpıada chempıony Sýn Insha kelmek. Sonymen qatar komandalyq tartysta jazǵy Olımpıadanyń kúmis medalin oljalaǵan Mıva Harımoto, Mıý Hırano, Tomokazý Harımoto qatysady.
Azııa chempıonatynda biz Rıo – 2016, Tokıo – 2020, bıylǵy Parıj Olımpadasynyń qatysýshysy Kırıll Gerasımenko, Tokıo Olımpıadasynda (2020) synǵa túsken Anastasııa Lavrova, jastar arasynda álem chempıony atanǵan Alan Qurmanǵalıev, halyqaralyq týrnırlerde olja salǵan Sarvınaz Myrqadyrova, Záýresh Aqasheva syndy úzdikterge senim artamyz.
