Atalǵan jobany júzege asyrý maqsatynda jarııalanǵan tenderdiń jeńimpazdary retinde qytaılyq 4 kompanııanyń anyqtalǵany belgili. Jeńimpaz kompanııalar maýsym aıynda Ulytaý oblysynyń ákimi Berik Ábdiǵalıulynyń qabyldaýynda bolyp, aldaǵy jumystar jóninde pikir almasty. Sol kezdesýde kompanııalardy tirkeý, jol qurylysyna jergilikti mamandardy tartý jáne t.b. máseleler sóz bolǵan edi. Mine, sodan beri birshama ýaqyt ótti.
Oblystyń ǵana emes respýblıkanyń ekonomıkalyq damýynda alatyn orny aıryqsha joba boıynsha qazirgi kezeńde nendeı jumystar atqaryldy? Aldaǵy ýaqytta qandaı sharýalar qolǵa alynady? Jergilikti kásipkerler men Qytaı kompanııalary arasynda qandaı iskerlik baılanystar ornatýǵa bolady?
Ulytaý oblysy Ulttyq «Atameken» kásipkerler palatasynda jergilikti kásipkerlerdiń bir toby Jezqazǵan – Qyzylorda baǵytyndaǵy 208 shaqyrym joldyń qurylysy boıynsha jarııalanǵan 8 lottyń jeńimpazdary bolyp tabylatyn qytaılyq «Stecol Corporation»,«CRCEG»,«China Civil Engineering Construction Corporation», «China Railway First Group» kompanııalarynyń ókilderimen kezdesti.
Kezdesý barysynda «QazAvtoJol» Ulttyq kompanııasynyń oblystyq fılıaly bastyǵynyń orynbasary N.Enbergenov jol qurylysyn Memleket basshysynyń óz nazarynda ustap otyrǵanyna toqtaldy. О́ıtkeni bul jol elimizdegi kólik logıstıkasyn damytýǵa óte qatty áser etedi. Joldyń sapaly ári belgilengen merzimde bitýi tehnıkalyq qadaǵalaý, Ulttyq sapa ortalyǵy tarapynan qatań baqylaýda bolady.
– Qurylysqa negizinen jergilikti jumys kúshi tartylady. Sondaı-aq jol salýǵa qajetti materıaldardy óndirý, qyzmet kórsetý salalaryna da qosymsha tapsyrys túsedi. Demek jańa jumys oryndary ashylady, – degen ol ekijaqty áriptestikti nyǵaıtýdyń tıimdiligine toqtaldy.
Dese degendeı, qazirdiń ózinde qytaılyq kompanııalar jergilikti salyq organdarynan tirkeýden ótti, ózderiniń keńse-ofısterin jasaqtap aldy. Kompanııalar taıaý ýaqytta vahtalyq qalashyqtar ornatý, aınalma jol salý tárizdi jumystarǵa kirise bastaıdy.
– Biz qys mezgilinde tıisti materıaldar qoryn jasap alǵymyz keledi. Keler jyly kún jylyǵan boıda iske kirisemiz. Jol qurylysyn 2026 jyldyń sońyna taman bitirýge mindettimiz, – deıdi olar.
Árıne, aıtýǵa ońaı. Oıǵa alǵannyń údesinen shyǵý úshin jumysty atqaryp shyǵýǵa qabiletti tehnıkalar, qural-jabdyqtar, bilikti mamandar, jumys kúshi jáne taǵysyn taǵylar bolýy kerek.
Bul rette qytaı kompanııalary jergilikti jerdiń múmkindikterin paıdalanýǵa múddeli. Sondyqtan da olar oblys kásipkerleri tarapynan túsetin usynystarǵa qyzyǵýshylyq tanytyp otyr.
Sátin salǵanda, jergilikti kásipkerler arasynan álden-aq birneshe usynys aıtyldy. Aıtalyq, «Jeztemirbeton» JShS temirbeton buıymdaryn, ınertti materıaldar berýge qabiletti. Olardyń sapasy talapqa saı keledi. Árıne, usynylǵan materıaldardyń qurylysty júrgizýshiler ózderiniń zerthanalary arqyly qaıta tekseristen de ótkize alady. Sol sııaqty «Gindlay Metals co.LTD» qıyrshyq taspen qamtamasyz etýge ázir. Bul kompanııanyń da sapa jóninen barlyq satydan ótken qujattary bar. «Remstroı» JShS jol qurylysyna qajetti ártúrli tehnıkalardy usyndy. «Iýtarııa LTD» JShS jumyskerlerdi kıim-keshekpen qamtý máselesinde óz qyzmetin usynýǵa ázir. Kompanııa jumyskerlerge, mamandarǵa qajetti kıimderdi tigip berip qana qoımaı, sonymen qatar olar kirlegen kezde jýyp, tazalap ta beredi.
Bul kezdesý barysynda aıtylǵan keıbir usynystar ǵana. Olardyń qatary ulǵaıa túsetini kúmánsiz. Mysaly, kezdesý barysynda qytaı kásipkerleri jaqsy zańgerdiń qyzmetin de qajetsinetinderin sezdirip qaldy. Azyq-túlik, as-sýmen qamtamasyz etetin kásipkerler de óz usynystaryn bildiretini kúmánsiz.
– Jezqazǵan – Qyzylorda avtojolyn jóndeý bizdiń óńirdiń halqy qanshama jyldan beri kóterip kele jatqan másele edi. Osy máselege Prezıdent tikeleı aralasty, nazaryna aldy. Aqyry másele sheshimin tapty. Qurylys bastalǵaly jatyr, halyq sondaı qýanyshty. Bul aýqymdy jobaǵa jergilikti kásipkerler de atsalysýǵa tıis. Sondyqtan, «Atameken» kásipkerler palatasy eki jaqtyń ózara baılanys ornatýyna dánekerlik jasap otyr. Bul rette baǵa saıasaty, jumystyń jedeldigi, tıimdiligi turǵysynan eki jaǵyna da kómek kórsetkimiz keledi, – deıdi Ulytaý oblystyq «Atameken» fılıalynyń dırektory G.Qajenova.
Halyqtyń kópten kútken sharýasy qolǵa alynǵan eken, endeshe, odan tysqary qalýǵa bolmaıdy. Halyqaralyq deńgeıdegi bir joba qolǵa alynyp edi, jergilikti jerdegi qanshama kásip qozǵalysqa tústi. Bul – naryqtyń zańy, talaby. Soǵan saı bolýǵa umtylǵan kásipker eshqashan utylmaıdy.
Ulytaý oblysy
