ASTANA. 15 maýsym. Elbasy Nazarbaev Ýnıversıtetiniń alǵashqy túlekterine dıplom berý rásimine qatysty. Bul týraly akorda.kz habarlady.
Jınalǵandarǵa sóz arnaǵan Memleket basshysy túlekterdi, olardyń ata-analaryn, Qamqorshylyq keńesiniń múshelerin, basshylyqty, professorlar men ýnıversıtet qyzmetkerlerin alǵashqy lektiń bitirýimen quttyqtady, sondaı-aq, mesenattarǵa alǵys aıtty.
Nursultan Nazarbaev dıplom tapsyrý rásimi ýnıversıtet qana emes, búkil respýblıka úshin de mańyzdy oqıǵa ekenin atap ótti.
«Tarıhymyzdaǵy alǵashqy halyqaralyq deńgeıdegi ǵylymı jáne bilim berý ortalyǵynyń – jetekshi joǵary bilim berý ornynyń tuńǵysh túlekteri endi búkil Qazaqstannyń ómirine aralasqaly otyr. Elimiz jas, jan-jaqty daıarlanǵan, bilikti mamandardyń jańa býyn ókilderine ıe boldy. Bul ásirese, Ult jospary negizinde memleketti jańǵyrtý jónindegi tereń ózgeristerge kirisip jatqan qazirgideı kezde aıryqsha mańyzdy», – dedi Qazaqstan Prezıdenti.
Memleket basshysy Astanada osyndaı ýnıversıtet ashý arqyly jahandyq bilim berýdiń qýatty jańa oshaǵy qalyptasqanyn atap ótti.
«Ol bizdiń ekonomıkamyz ben ómirimizdi bilimmen, ǵylymı jańalyqtarmen, ınnovasııamen eseleıtin bolady. Azamattarymyzdyń ómirin jaqsy jaǵyna ózgertip, olardyń boıyna bastamashylyq pen otanshyldyqty, úzdiksiz oqý men kásibı ósýdiń mashyǵyn ornyqtyrady Bunyń bári Qazaqstannyń turaqty jáne jahandyq turǵydan damyǵan memleket retinde ómir súrýi úshin, óz memleketimizdi jańǵyrtyp, nyǵaıtý úshin, Otanymyzdyń bedeli men álemge tanymaldyǵyn arttyrý úshin jasalýda. Sizderge ómirlik joldama berý arqyly biz osy kókeıtesti maqsatymyzǵa qaraı jaqyndaı tústik», – dedi Nursultan Nazarbaev.
Qazaqstan Prezıdenti túlekterge ýnıversıtettiń tarıhı tiziminiń basynda turý mártebesi buıyryp otyrǵanyna nazar aýdardy.
«Ýnıversıtettegi daıarlyq deńgeıin sizder arqyly, sizderdiń isterińiz arqyly baǵalaıtyn bolady, bul – aıryqsha jaýapkershilik. Men sizderdiń árqaısyńyzdan zor qulshynys pen kásibı deńgeı kútemin. Sizderdiń oqýlaryńyz alǵashqy dıplomdy alýmen aıaqtalmaıdy. Ol ómir boıy jalǵasady. Eń basty ómirlik tájirıbeni oqýdan keıin meńgeresizder. Oǵan qalaı qol jetkizýdi sizderge bes jyl boıy oqytty. Eger mamandyqtaryńyz ben eńbekterińiz ómirlik súıikti isterińizge aınalmasa, jattalǵan nárse tez umytylýy múmkin. О́z isiniń naǵyz kásipqoıy tek bilip qana qoımaıdy, bilgenin naqty iske asyra da alady. Ýnıversıtettiń barlyq túlekteri osyndaı kásipqoılar bolatynyna senemin», – dedi Memleket basshysy.
Bul oraıda, Nursultan Nazarbaev túlekter óz isiniń sheberi ǵana bolyp qoımaı, Qazaqstan qoǵamynyń adamgershilik qundylyqtaryn da jan-jaqty nyǵaıtyp, óz Otanyna qyzmet etýdiń bıik úlgisin tanytatynyna, halqymyzdyń materıaldyq, rýhanı jáne mádenı qundylyqtaryn eseleý isine zor úles qosatynyna aıryqsha senim bildirdi.
Qazaqstan Prezıdenti elimizdiń bilim berý salasyndaǵy birqatar jetistikterine toqtalyp ótti.
«Dúnıejúzilik ekonomıkalyq forým jarııalaǵan Adamı kapıtaldy damytý ındeksine sáıkes, Qazaqstan bir jylda birden 8 orynǵa kóterilip, 37-orynǵa shyqty jáne Ekonomıkalyq yntymaqtastyq jáne damý uıymyna múshe Portýgalııa, Grekııa, Ispanııa, Chılı, Meksıka, Túrkııa, sondaı-aq, Malaızııa, Qytaı, Brazılııa sııaqty elderden ozdy. Eldiń saýattylyq deńgeıiniń reıtıngi boıynsha Qazaqstan 33-oryndy ıelendi, al bilim berý júıesiniń sapasy jóninen birden 9 tarmaqqa kóterildi. Bul tabystarǵa sizderdiń ýnıversıtet te zor úles qosty», – dedi Nursultan Nazarbaev.
Memleket basshysy ýnıversıtet túlekteri memleketimizdiń jańa býyn elıtasynyń negizi ekenin atap aıtty.
«Eldi damytyp, halyqty baqytqa, baq-berekege jetkizý isi sizderge júkteledi. Munyń qanshalyq qıyn is ekenin men jaqsy bilemin. Búgingideı jahandaný jaǵdaıynda sizderge turaqtylyq pen damý qarqynyn ustap turýdan da artyǵyraq maqsatqa umtylý qajet bolady. Sizderge «Bastan asyp sekire almaısyń» dep qansha jerden nyqtasa da, bıik meje qoıýǵa týra keledi. Eger sizderde qazir bekem ári batyl ambısııa bolmasa, onda keıin tabysqa jetý úshin kúsh-jiger tabý qıyn bolady», – dedi Qazaqstan Prezıdenti.
Nursultan Nazarbaev ýnıversıtettiń dıplom ıegerlerin jumysqa qabilettilik, tapqyrlyq, shıraqtyq tanytýǵa shaqyrdy.
«Men bizde basqarýshylardyń, memlekettik qyzmetkerlerdiń, bıznesmender men qoǵamdyq kóshbasshylardyń jańa shoǵyry ósip kele jatqanyn kórip otyrmyn. Kóp uzamaı Qazaqstan mamandary, eń aldymen, osy ýnıversıtettiń túlekteri búkil álemge óziniń jańashyldyǵyn, básekege qabilettiligin jáne qajettiligin kórsetedi dep senemin. Álemniń jetekshi ýnıversıtetteriniń tarıhy – eń aldymen onyń túlekteriniń tabysynyń tarıhy. Bul ýnıversıtette de onyń túlekteri atqarǵan uly isterdiń jahandyq aıshyqty tarıhy bolatynyna senimdimin», – dedi Memleket basshysy.
Qazaqstan Prezıdenti bul kúnderi búkil elimiz boıynsha myńdaǵan qazaqstandyq stýdenttiń dıplom alyp jatqanyna nazar aýdardy.
«Joǵary oqý oryndarynyń barlyq túlekterin quttyqtaımyn, olarǵa ómirden laıyqty oryndaryn tabýyn, sáttilik jáne baqyt tileımin. IýNISEF-tiń baǵalaýy boıynsha, Jastardyń damýynyń jahandyq ındeksinde Qazaqstan 27-oryn alyp otyr. Bul Fransııa, Túrkııa jáne Shvesııa sııaqty elderdiń kórsetkishinen joǵary. Biz qazirgi atqaryp jatqan isterimizdiń bárin sizder úshin, sizderdiń bolashaqtaryńyz úshin jasap jatyrmyz. Búginde sizderdiń aldaryńyzdan búkil álemge jol ashyq. Sizder qyzyqty kezeńde ómir súrip, bolashaqqa qaraı qaryshtap qadam basqan elmen birge erjetip kelesizder. Osynyń barlyǵy bizdiń qoǵamdaǵy tatýlyq pen turaqtylyqtyń arqasynda. Sondyqtan sizderdiń basty mıssııalaryńyz – eldegi birlik pen kelisimdi nyǵaıtý. Barshaǵa beıbit zaman men ıgilikti ómir jolyn tileımin», – dedi Nursultan Nazarbaev.
Stýdentter men oqytýshylar ýnıversıtettegi jasalǵan jaǵdaı úshin Memleket basshysyna alǵystaryn aıtyp, kúsh-jigerlerin eldiń budan ári damý jolyna jumsaıtyndaryn jetkizdi.
***
Nazarbaev Ýnıversıtetiniń tuńǵysh túlekteri qatarynda 446 stýdent oqýyn bitirdi. Oqý ornynyń qurylǵan kezinen beri bilim alyp kele jatqan jastardyń jalpy sany 2 800-ge jetti. Oqýǵa túsý emtıhandarynyń qorytyndysy boıynsha eń joǵary nátıjege qol jetkizgen talapkerler stýdenttiń ýnıversıtettegi barlyq oqý kezeńindegi shyǵyndaryn óteıtin memlekettik bilim berý granty arqyly oqıdy. Grantqa jyl saıyn 500 adam ıe bolady.
Stýdentterdiń basym kópshiligi gýmanıtarlyq jáne áleýmettik ǵylymdar, ınjenerııa, ǵylym men tehnologııa mektepterinde, sondaı-aq, bilim berý, memlekettik saıasat jáne bıznestiń joǵary mektepterinde oqıdy. Oqýshylardyń arasynda kompıýterlik ǵylymdar, ınjenerlik mehanıka, robotty tehnıka jáne mehatronıka, bilim berý isin basqarý, bıologııalyq ǵylymdar, elektrlik jáne elektrondyq ınjenerııa, sondaı-aq, qurylys ınjenerııasy mamandyqtary meılinshe suranysqa ıe bolyp otyr.
Elaman Qońyr.
Derek, sýret: akorda.kz.
