Abaı dańǵyly boıyndaǵy qutty shańyraqta ardaqty aqyn 2000-jyldardyń basynan bastap, aqyrǵy demi úzilgenge deıin turyp, kóptegen shyǵarmasyn jazdy. Ásirese «Bostandyq jyrynyń bozjorǵasy» atanǵan shaıyrdyń elordaǵa kóship kelgennen keıin jańa tynysy ashylyp, el táýelsizdigi men sol jolda qurban bolǵan bahadúrler týraly tebirenip jyrlady. Sońǵy demine deıin qolynan qalamyn tastamaǵan qalamgerdiń ulttyq qunarǵa baı aıshyqty óleńderinen basqa, 40-qa jýyq keń tynysty poema ómirge keldi. Solardyń deni osy úıde jazyldy.
Is-sharany júrgizgen Qazaqstan Jazýshylar odaǵy Astana qalalyq fılıalynyń dırektory Dáýletkereı Kápuly aldymen qazaq óleńiniń aspanynda úıir-úıir bult aıdaǵan aıtýly aqyn shyǵarmashylyǵyna toqtaldy. Odan keıin sóz alǵan Astana qalasy máslıhatynyń tóraǵasy Erlan Qanalımov ult ádebıetiniń qazynasyn baıytqan syrshyl sýretkerdiń rýhanııatymyzǵa qosqan úlesi mol ekenin jetkizdi.
«Nesipbek Aıtuly sekildi turpaty bólek talanttar sırek kezdesedi. Aǵamyzdyń jazǵan dúnıeleri – ultymyzdyń ǵana emes, álem ádebıetiniń injý-marjany der edim. Poezııada jyraýlardyń jolyn jalǵap, ónegeli iz qaldyrdy. Sondyqtan aqynnyń shuraıly tilmen shynaıy jazylǵan shyǵarmalary – jas urpaqqa máńgilik qazyna bolyp qala beredi», dedi ol.
Al belgili aqyn, Memlekettik syılyqtyń laýreaty Ǵalym Jaılybaı búgingi oqıǵa elordanyń rýhanı-mádenı álemindegi mazmundy is-shara ekenin aıtty.
«Qazaq rýhanııatyna talmaı eńbek etken Nesaǵań týraly kóp aıtýǵa bolady. Shyn máninde, ol – baqytty adam. Eki qoǵamdyq formasııany kórip, eki ǵasyrda ǵumyr keshti. Urpaq ósirdi. Qazaq óleńiniń ǵajaıyp úlgilerin jańartty. Bir sózben aıtqanda, Nesipbek Aıtuly – ult rýhanııatyndaǵy juldyzy jaryq tulǵanyń biri. Onyń aǵyl-tegil aq jańbyrdaı tógilgen óleńderi, «Án dombyra», «Saryarqa», «Dáýren-aı», «Arman», «Darıǵa, dáýren» degen el súıip tyńdaıtyn ánge jazǵan sózderi, Júnis Emireden bastap, Álisher Naýaıǵa deıingi aýdarmalary – ult ádebıetinde aqyn esimin aıshyqtap turady», degen Ǵ.Jaılybaı qalamdas aǵasynyń rýhyna arnap jazǵan óleńin oqydy.
Budan keıin «Amanat» partııasy Aqsýat aýdandyq fılıalynyń tóraǵasy Erjan Quttybaev aqyn jerlesteriniń sálemin jetkizse, balasy Nurat Nesipbekuly osy taqtany qoıýǵa muryndyq bolǵan Astana qalasy ákimdigi men jınalǵan qaýymǵa rızashylyǵyn bildirdi. Eskertkish taqtany aqynnyń zaıyby Manat apaı men Astana qalasy máslıhatynyń tóraǵasy Erlan Qanalımov ashty.
