Atalǵan qujattar GFR kansleri Olaf Sholstiń elimizge resmı sapary aıasynda rásimdeldi.
Birinshi qujat – «Siemens» JShS-men jasalǵan strategııalyq kelisim, oǵan Qazaqstan-Germanııa iskerlik forýmy aıasynda qol qoıyldy.
Bul kelisim boıynsha Túrkistan oblysynda shyǵyn ólshegishterin shyǵaratyn birlesken kásiporyn qurý kózdelgen. Shyǵyn ólshegishter elektrótkizgish suıyqtyqtardyń shyǵynyn ólsheýge, ony esepke alýǵa arnalǵan. Mundaı aspaptar ýran óndirýde keńinen qoldanylady. Osy oraıda elimizdiń ýran óndiretin kásiporyndarymen uzaqmerzimdi kelisimshart jasaý kózdelgen.
«Nemis konglomeratymen seriktestik respýblıkada ólsheý tehnıkasy men avtomattandyrý salasynda jańa tıimdi tehnologııalardy qoldanýǵa, joǵary korporatıvtik standarttardy damytýǵa jáne bıznesti júrgizýdiń ozyq tájirıbelerin engizýge yqpal etedi», deıdi qor basshysy Nurlan Jaqypov.
«Siemens» JShS quryltaıshysy «Siemens AG» – 133 mıllıard eýro kapıtalızasııasy bar uıym. Ol elektrtehnıka, elektronıka, energetıkalyq jabdyqtar, kólik, medısınalyq jabdyqtar men jaryqtandyrý tehnıkasy salalarynda, sondaı-aq ónerkásip, kólik jáne baılanys salalarynda arnaıy qyzmettermen aınalysatyn nemis konglomeraty.
Ekinshi qujat – «Samuryq-Qazyna» AQ men «Siemens Energy» arasyndaǵy seriktestik týraly memorandým. «Siemens Energy» kompanııasy elimizdegi «Siemens Energy» parkine ǵana emes, kórshiles Ortalyq Azııa elderindegi ókildikterine de qyzmet kórsetetin servıs habyn Qazaqstanda qurý múmkindigin qarastyryp jatyr.
«Siemens Energy» – «Siemens» enshiles uıymy, ol energetıkalyq jabdyqtardy óndirýge, energetıka salasyndaǵy qyzmetterdi usynýǵa arnaıy qurylǵan.
