Úndeý mátininde tómendegideı oı-pikir jazylǵan:
«Bul kún – bizdiń aǵa býynǵa rızashylyǵymyzdy bildirip, shynaıy kóńil bólýimizge múmkindik berip qana qoımaı, olardyń qajettilikterine nazar aýdarýǵa jaqsy sebep. Qarııalardy qoldaý, olarǵa qamqorlyq kórsetý – aǵa býynǵa kórsetken paryzymyzdyń az ǵana bóligi. «Ardagerler uıymy» respýblıkalyq qoǵamdyq birlestiginiń bastamasymen jyldar boıy elimizde qazan aıy «Qarttarymyzdy qamqorlaı júreıik!» aksııasyna ulasyp keledi. Qazaq halqynyń dástúrinde úlkendi syılap, aqylyn tyńdap, aldynan kese-kóldeneń ótpegen. Elimizde qart adamdarǵa degen qamqorlyq jyl saıyn artyp keledi. Jasynyń egde tartýyna, densaýlyǵynyń syr berýine baılanysty qarttardyń kóptegen sheshilmegen máselesi týyndaıtynyn bilesizder, sondyqtan olarǵa qoldaý kórsetý – týǵan-týystary men barsha qoǵamnyń mindeti.
Memleketimiz qarttarǵa degen qamqorlyqty ekonomıkalyq daǵdarys kezinde de toqtatqan emes. Degenmen elimizde áli de bolsa áleýmettik kómekke muqtaj egde adamdar bar.
Keıbir qarııalar jasy ulǵaıǵan shaǵynda jan jylýy men meıirimge zárý. Barlyq qazaqstandyqty, jumys berýshilerdi, bıznes qurylym ókilderin, aǵa býynnyń el ıgiligine qosqan eseli eńbegin ulyqtaýǵa, «Qarttarymyzdy qamqorlaı júreıik!» aılyq aksııasyna atsalysýǵa shaqyramyz.
Qarııalarǵa materıaldyq turǵydan qolushyn sozýǵa, áleýmettik-turmystyq jaǵdaılaryna qoldaý kórsetýlerińizdi suraımyz. О́z eliniń patrıoty retinde aksııaǵa beıjaı qaramaıtyn azamattar jergilikti ákimdiktermen, óńirlik ardagerler keńesterimen baılanysqa shyǵyp úles qosady degen úmittemiz».
