Foto: GOV.KZ
Ertis-Baıan óńiriniń polısııa qyzmetkerleri Qazaqstan Respýblıkasy azamatynyń jeke basyn kýálandyratyn qujattardy ýaqytyly almaǵan jáne 18 jasqa tolǵan kezde qajetti qujattardy rásimdemegen tulǵalardy anyqtaǵan. Tipti olardyń keıbireýleri keńestik tólqujatpen júrgeni belgili boldy.
«Jyl basynan KSRO úlgisindegi eski tólqujatpen júrgen 12 pavlodarlyq anyqtaldy. Buǵan qosa 18 jasqa tolsa da jeke kýálik resimdemegen 20 azamat, sondaı-aq azamattyǵy joq, biraq kýálik resimdemegen 8 turǵyn anyqtaldy. Olardyń barlyǵyna tıisti qujattary jasaldy. Qujaty joq adamdardyń deni TMD-daǵy ózge memleketterden kelgender, olar sol eldiń jaramdylyq merzimi ótken tólqujatymen júrgen. Kóbi KSRO-nyń burynǵy odaqtas memleketterinen kámelet jasyna tolmaı turyp Qazaqstanǵa kóship kelgen», dedi Pavlodar oblysy polısııa departamenti kóshi-qon qyzmetiniń bastyǵy Dáýlet Ysqaqov.
Tıisti qujaty bolmaǵandyqtan atalǵan azamattar osy ýaqytqa deıin túrli áleýmettik tólemderdi ala almaı, memlekettik qyzmetterdi alýdan qıyndyq kórip kelgen.
