Foto Senattyń baspasóz qyzmeti
Senat depýtaty Sergeı Ershov Prezıdent Joldaýynyń negizgi máseleleri jáne atom elektr stansııasyn salý jónindegi túsindirý jumystary aıasynda «Bolashaq» akademııasynyń oqytýshylary jáne stýdentterimen kezdesti.
Senator Qazaqstannyń bolashaǵy úshin atom elektr stansasy qurylysynyń strategııalyq mańyzyn talqylaýǵa erekshe nazar aýdardy. Ol elimizdiń energetıkalyq qaýipsizdigi men turaqty ekonomıkalyq ósip-órkendeýin qamtamasyz etý máseleleriniń sheshimi – atom energetıkasy bolatynyn atap ótti. Ershov Qazaqstan ónerkásip pen ınfraqurylymnyń damýy aıasynda elektr energııasyna suranystyń ulǵaıyp otyrǵanyn, atom elektr stansııasynyń energııamen turaqty qamtamasyz ete alatynyna toqtaldy.
«Atom elektr stansasynyń qurylysy Qazaqstanǵa elektr energııasyna ósip kele jatqan suranystyń sheshimin tabýǵa jáne elimizdi uzaq merzimdi keleshekte senimdi energııa kózimen qamtamasyz etýge múmkindik beredi. Bul ekonomıkalyq belsendilikti qoldaýǵa jáne azamattarymyzdyń ómir súrý sapasyn jaqsartýǵa baǵyttalǵan mańyzdy qadam», dep atap ótti Sergeı Ershov.
Senator kezdesý barysynda atom elektr stansııasyn paıdalaný qaýipsizdigi jáne osy saladaǵy halyqaralyq tájirıbe týraly jan-jaqty túsindirdi. Júzdesýge qatysýshylar atom energetıkasyn damytýdyń keleshegi men tómen kómirtekti ekonomıkanyń áseri jáne elimizdiń energetıkalyq sektoryn jańǵyrtý isine basa nazar aýdardy.
Stýdentter men oqytýshylar mundaı jobalardyń Qazaqstannyń ekologııalyq jaǵdaıy men áleýmettik-ekonomıkalyq damýyna áseri týraly suraqtar qoıdy.
Ershov aldaǵy ýaqytta ótetin atom elektr stansasyn salý jónindegi referendým taqyrybyna toqtala kelip, Prezıdent Qasym-Jomart Toqaev elimizdiń árbir azamatynyń pikirin eskerý úshin referendým ótkizý týraly bastama kótergenin atap ótti.
