Foto: Botakóz Baqbergen
Dástúrli is-sharanyń birinshisi sessııasy «О́ńirlik BAQ damýynda sınergııanyń kórinisi» taqyrybyna arnaldy. Respýblıkalyq basylymdardyń basshylary men Mádenıet jáne aqparat mınıstrliginiń ókilderi gazet-jýrnaldardyń, ınternet basylymdardyń jumysynda birneshe jyl boıy sheshimin tappaı júrgen máselelerdi qozǵady.
Sessııany ashqan moderator - «24KZ» telearnasynyń dırektory Jasyn Birkenov minberde sóz sóılep, tájirıbesin bólisken qonaqtardy tanystyrdy.
«Qazaq gazetteri» JShS Bas dırektory Dıhan Qamzabekuly seriktestik qurylǵaly beri elimizdiń bas gazetteri - «Egemen Qazaqstan» jáne «Kazahstanskaıa pravda» birigip, ózara sınergııany qalyptastyrǵanyn atap ótti. Ol sondaı-aq seriktestik quramyna jalpy 6 gazet pen 5 jýrnal kiretinin eske saldy.
«Búginde merzimdi basylymdar jumysynda sheshilmeı jatqan kóptegen másele bar. Biz de iri seriktestik retinde bul máselelerdi kúnde baıqap otyramyz. Máselen, avtorlyq quqyqty saqtaý máselesi búginde óte ótkir qozǵalyp otyr. Bul fotojýrnalıster men tilshilerdiń jumysynda qıyndyq týǵyzady. Sottasýǵa deıin de jetken oqıǵalardy bastan keshirdik. Bul jýrnalıster men mass-medıa ókilderiniń mártebesin kóterý men quqyǵyn qorǵaý boıynsha jumystar birshama toqtap qalǵanyn bildiredi. Taǵy bir másele - qarjylandyrý men jarnama. Búginde «Gazet-jýrnaldardy kim oqıdy? Qazirgi zamanda gazet oqý ózekti emes» degen oǵash pikirler qalyptasyp jatyr. Dese de, gazet oqıtyn adamdar bar, ár kez bolady da. Gazet salasyna tek qoldaý qajet. Búginde jarnama berýshiler edáýir azaıǵan, gazet betterinde tek nekrologtardy ǵana kórýge bolady. Iá, bul shyndyq.
Kelesi másele - gazet bedeli. Máselen, 80-90 jyldary eldiń bas basylymdarynyń betterine qandaı da bir sheneýnikke qatysty synı materıal shyqsa, oǵan dereý sógis jarııalanyp, laýazymynan da aıyrylyp qalýy múmkin edi. Al analıtıkalyq maqalalardyń deńgeıi qazirgi materıaldarmen salystyrǵanda joǵary bolatyn edi. Budan taǵy bir másele týyndaıdy - jýrnalısterdiń saýaty, jas mamandardy oqytý sapasy», dedi Dıhan Qamzabekuly.
Sondaı-aq sessııa barysynda óz oıyn ortaǵa salǵan «Syr-media» JShS Bas dırektory Marat Aralbaev qazirgi sıfrlyq dáýirde dástúrli baspanyń orny men mártebesi týraly sóz qozǵady.
«Qazirgi sıfrlyq dáýirde oqyrmandar óz nazaryn jedel aqparatqa salady. Bul saıttar men áleýmettik jelilerdiń bedelin birshama kótergeni anyq. Alaıda dástúrli BAQ joıylyp ketken joq. Suranys bar. Gazet-jýrnaldardyń úsh negizgi qarjylandyrý kózi bar: memlekettik tapsyrys, jarnama, oqyrmandardyń jazylýy. Aıta keteıin, biz 2016 jyldan beri gazetterdi ózimiz shyǵaramyz, jazamyz, basamyz. Basqa gezetterdiń taralýyna da úles qosamyz. Bul da ózara sınergııanyń kórinisi. Alaıda, bizge jáne basqa da óńirlik, respýblıkalyq basylymdarǵa «Qazposhtanyń» qoldaýy qajet. Sońǵy ýaqytta kóptegen basylym basshylarynyń «Qazposhta» jumysyna shaǵymdary kóbeıip ketken. Bul máseleler aldaǵy ýaqytta sheshimin tabady degen úmittemin», dedi spıker.
Al QR Mádenıet jáne aqparat mınıstrliginiń BAQ salasyndaǵy memlekettik saıasat departamentiniń dırektory Qaınar Ahetov jaqynda Memleket basshysy «Mass-medıa týraly» zańdy maquldap, qol qoıǵany, ol kúshine engenin eske salyp, Astana Media Week alańynda kóterilgen barlyq másele atalǵan zańmen retteletinin aıtty.
Sondaı-aq eldiń túpkir-túpkirinen jınalǵan óńirlik BAQ ókilderi de taqyrypqa baılanysty pikir bildirip, usynystaryn ortaǵa saldy.
