foto Senattyń baspasóz qyzmeti
Senatorlar atom elektr stansııasyn salý qajettiginiń negizgi sebepterine toqtala kelip, elektr energııasyna degen suranystyń kóbeıip kele jatqanyn atap ótti. Atom energetıkasy dástúrli qýat kózdermen salystyrǵanda energııa júıesin jańǵyrtýǵa, halyqaralyq yntymaqtastyqty tereńdetýge zor múmkindik beredi.
Nurlan Beknazarov atom elektr stansııasynyń qurylysy uzaq merzimdi ekonomıkalyq damý turǵysynan Qazaqstanǵa eń utymdy tańdaý bolyp tabylatynyn aıtty.
«Elimizde energııa tapshylyǵy jyl saıyn artyp keledi. Eger bul máseleni búgin sheshpesek, bolashaqta odan da kúrdeli jaǵdaıǵa tap bolýymyz múmkin. Atom energetıkasy uzaq merzimdi keleshekte elektr energııasy tarıfiniń turaqtylyǵyn qamtamasyz etedi. Ol ásirese ónerkásipti damytý jáne qazaqstandyq ekonomıkanyń básekege qabilettiligin arttyrýda asa mańyzdy. Sonymen qatar, AES qurylysynyń jobasy jańa jumys oryndaryn ashady jáne óńirde ınfraqurylymdy damytýǵa yqpal etedi», dedi Nurlan Beknazarov.
Nurtóre Júsip óz kezeginde atom elektr stansııasyn salý Qazaqstannyń energetıkalyq qaýipsizdigin nyǵaıta túsetinin, shyǵaryndyny azaıtý esebinen ekologııalyq jaǵdaı jaqsartatynyn jáne tehnologııa men ónerkásipti damytý jolyndaǵy negizgi qadam bolatynyn jetkizdi.
«Atom elektr stansııalary qazirgi álemdegi elektr energııasynyń negizgi kóziniń biri bolyp tabylady, birqatar elderde energetıkalyq qaýipsizdik pen ekonomıkalyq ósýdi qamtamasyz etedi. Olar kómirqyshqyl gazynyń az shyǵaryndysymen aýqymdy kólemde elektr energııasyn óndirýge múmkindik beredi. Energııaǵa suranys qarqyndy ósip kele jatqan jaǵdaıda jáne klımattyń ózgerýine qarsy kúres jappaı beleń alǵanda atom energetıkasy elderge jahandyq básekelestikke ilesý, turaqty ekonomıkalyq ósýdi qoldaý jáne halyqtyń ál-aýqatyn jaqsartý múmkindigin bere otyryp, senimdi jáne keleshegi zor sala bolyp qala beredi», dedi Nurtóre Júsip.
Aıgúl Qapbarova Qazaqstanda elektr energııasyn óndiretin stansııalardyń 70%-ǵa tozǵanyn atap ótti. Ol atom elektr stansııasynyń qurylysy úılerdegi jylýdy qamtamasyz etý men ekologııany jaqsartýdan bastap bıznesti damytýǵa jáne jańa kásiporyndar ashýǵa deıingi kóptegen salalarǵa yqpal etetin mýltıplıkatıvti áseri bar aýqymdy joba ekenin jetkizdi. Bul turǵyda atom elektr stansııasyn salý atalǵan máselelerdi sheshýde negizgi qadam bolyp tabylady.
«Qazaqstannyń halyqaralyq ekologııalyq mindettemesi bar, oǵan sáıkes elimiz 2060 jylǵa qaraı kómirteginen beıtarap bolýǵa qol jetkizýi tıis. Osy turǵyda Eýropalyq Odaq kómir energııasyn paıdalanyp óndirgen ónimge salyq salý máselesin talqylaı bastady. Atom elektr stansııasy bolashaqta turaqty jáne ornyqty energetıkany qamtamasyz etýdiń negizgi sheshiminiń biri bola alatynyn atap ótý kerek», dedi Aıgúl Qapbarova.
Depýtattar kezdesý sońynda atom elektr stansııasynyń qurylysy urpaq bolashaǵyna degen qamqorlyqty kórsetetin salmaqty sheshim ekenin atap ótti. Osyǵan baılanysty árbir qazaqstandyqtyń aldaǵy referendýmǵa qatysýy jáne elimizdiń damýyna óz úlesin qosýy mańyzdy ekeni daýsyz.
