foto QR Aýyl sharýashylyǵy mınıstrligi
Meńdiqara aýdanynyń egis alqabynda sharýalarmen júzdesken vıse-premer 2025 jylǵy kóktemgi egis jumystaryn qarjylandyrý bıyl bastalatynyn aıtyp qýantty.
«Biz fermerlerdi qoldaý kólemin birtindep arttyryp jatyrmyz. Atap aıtqanda, kóktemgi-kúzgi dala jumystaryna jeńildigi bar qarjylandyrý kólemin 700 mlrd teńgege deıin ulǵaıtamyz, onyń shamamen 40%-y «Damý» qory arqyly kepildendiriledi. Aýyl sharýashylyǵy tehnıkasyn lızıngke kredıtteý kólemi 100 mlrd teńgeden 200 mlrd teńgege deıin ósedi. Nátıjesinde jyl saıynǵy jumystardy qamtamasyz etý úshin fermerlerdi qoldaý somasy 900 mlrd teńgege deıin ulǵaıady», dedi Serik Jumanǵarın.
Vıse-premer óńirlerde fermerler jańa jyldyń basynda kóptegen qajetti taýarlardyń baǵasy ósetindikten, «Keń Dala» baǵdarlamasy boıynsha kóktemgi jumystarǵa qol jetimdi qarajatty kúzde alǵan jón ekenin aıtqanyn jetkizdi.
«Bıylǵy qarasha-jeltoqsan aılarynda biz bul prosesti bastaımyz. Úlken joba boıynsha jeńildigi bar qarjylandyrý kólemin kelesi jylǵa jyldyq 2,5% mólsherlememen 100 mlrd teńgeden 200 mlrd teńgege deıin ulǵaıtyp, nesıeleý úshin taǵy 8 jańa baǵyt qosamyz. Bul – etti mal sharýashylyǵy, ónerkásiptik jylyjaı keshenderi, jemis saqtaý qoımalary, balyq ósiretin balyq óńdeý sharýashylyqtary, oraý óndirisi, tereń óńdeý jáne basqalary», dep naqtylady vıse-premer.
Onyń aıtýynsha ekinshi deńgeıdegi bankter men basqa da qarjy ınstıtýttarynyń jeńildigi bar qarjylandyrýyn, sondaı-aq aınalym jáne ınvestısııalyq qarajat túrindegi qoldaýlardy qosqanda, memlekettik qoldaý kólemi 1,3 – 1,4 trln teńgege deıin jetkiziledi.
Fermerler aldaǵy ózgeristerdi, ásirese kóktemgi egis jumystaryn erte qarjylandyrý týraly jańalyqty qýana qabyldady. Olar sondaı-aq aımaqta jetkilikti úlken kólemde kútilip otyrǵan 4-synypty bıdaıdy forvardtyq satyp alý baǵasy qansha bolatynyna qyzyǵýshylyq tanytty. Premer-Mınıstrdiń orynbasary fermerlerdiń baǵaǵa qatysty saýaldaryn tyńdap, Azyq-túlik korporasııasyna onyń mólsherin múmkindiginshe tezirek jarııalaýdy tapsyrdy.
Serik Jumanǵarın sonymen qatar qostanaılyq jylqy tuqymyn ósirýmen aınalysatyn «Qazaq tulpary» JShS-nyń jumysymen tanysty. Qazaqy jylqy tuqymyn saqtap, nasıhattaýdyń mańyzyn nazarǵa ala otyryp, Aýyl sharýashylyǵy mınıstrligine Qazaqstanda qurylyp jatqan Jylqy sharýashylyǵy ınstıtýtynyń bazasynda jeke qarajat esebinen jylqy zaýytyn jańǵyrtý baǵdarlamasyn daıyndaýdy tapsyrdy.
