Sýret: ru.freepik.com
Innovasııalyq medısına ǵylymı-klınıkalyq ortalyǵy dárigerlerinen quralǵan komandanyń aıtýynsha, jobanyń negizgi maqsaty – halyqqa tegin ári qoljetimdi skrınıng usyný. Platforma jalpy qan taldaýynyń nátıjelerine negizdelgen ımmýnologııalyq derekterdiń keń aýqymyn taldaıdy, jasyryn ınfeksııalardy anyqtap, organızmniń aýrý-syrqaýǵa, ekpege, fızıkalyq júktemeler men streske áserin baqylaýǵa kómektesedi. Sonymen qatar atalǵan qosymsha ımmýnıtetti qalypta ustap, nyǵaıtý úshin naqty usynystar aıtady. «ImmuniGuide» jobasynyń avtorlary – Nurlybek О́derbaev pen Igor Ponamarev.
«Oıymyzda jobanyń alǵashqy ushqyny 2016 jyly paıda boldy. Sodan beri 8 jyl tynbaı eńbektendik, izdendik, jemisin endi kórip jatyrmyz. Osy ýaqyt ishinde 4 avtorlyq quqyq alyp, saýda markasyn tirkep qana qoımaı, platformanyń qurylymyn qaıta qarap, oǵan jasandy ıntellektini qostyq. Bıyl shildede ónimdi óndiriske sátti engizip, belsendi qoldanyp jatqan klınıkalar men emhanalarda jaqsy kórsetkishter baıqap otyrmyz. Platforma usynǵan nátıjelerdiń dáldigi ortasha eseppen 98,7%-dy quraıdy. Munyń tájirıbe men ǵylymı turǵyda dáleli bar», dedi «ImmuniGuide» negizin teń qalaýshy, medısına ǵylymdarynyń doktory, dáriger-onkolog Nurlybek О́derbaev.
Jobanyń basty artyqshylyǵy – medısınalyq derekterdi joǵary jyldamdyqpen, dáldikpen óńdeı alatyn jasandy ıntellekt, bul egjeı-tegjeı jekelendirilgen esepterdi kez kelgen tilde usynýǵa múmkindik beredi.
Otandyq ónim densaýlyq saqtaý salasyn jaqsartýǵa joǵary áleýet kórsetip, halyqaralyq alańǵa shyǵýǵa daıyn ekenin tanytty. Á degennen-aq bul jobaǵa shetelden qyzyǵýshylyq tanytqandar birshama. Atap aıtqanda, qazir Malaızııa tarapymen platformany sol aımaqta synaqtan ótkizý boıynsha kelissóz júrgizilip jatyr. Joba jetekshileriniń aıtýynsha, aldaǵy ýaqytta tehnologııa aıasyn keńeıtip, Azııa, Eýropa, AQSh elderine engizý josparlanyp otyr.
