Premer-mınıstrdiń keńesshisi Eraly Toǵjanovtyń aıtýynsha, taýarly nesıeniń maqsaty – aýyl turǵyndarynyń ál-aýqatyn kóterý. Jańa joba kredıttik jaǵdaıy qıyn jáne kepilge qoıatyn múlki joq adamdarǵa arnalǵan.
«Bastamany qoldaǵan fermerler turmysy tómen otbasylarǵa 8 880 mal taratty. Jobaǵa sáıkes, 5 jylǵa nesıege 10 sıyr beriledi. Ony qaıtarý sharty negizinde birinshi jyly – demalys. Nesıege mal alǵan adam ekinshi jyly 4, úshinshi jyly taǵy 4 sıyrdy qaıtarýǵa tıis. Bizdiń esebimizshe, tórtinshi jyly mal sany tólimen 16-ǵa jetýi kerek. Al 7 jylda múıizdi iri qarany 24-ke deıin kóbeıtýge bolady», deıdi E.Toǵjanov.
Jylyoı aýdanyndaǵy «Dostan ata» sharýa qojalyǵynyń jetekshisi Seıitjan Baljigitov atalǵan baǵdarlamamen taýarly nesıe berýge daıyn otyr.
«Aýyl turǵyndaryn kásipkerlikke yntalandyrý maqsatynda qolǵa alynǵan taýarly nesıe baǵdarlamasyn qoldaımyn. О́zim jetekshilik etetin sharýa qojalyǵynan 300 qoı, 100 jylqy, 50 sıyr, 30 túıeni nesıege bere alamyn. Osy arqyly taýar alýshynyń da, bizdiń de tórt túligimiz kóbeıedi», dedi S.Baljigitov.
Qyzylqoǵa aýdanyndaǵy «Qurman» sharýa qojalyǵynyń jetekshisi Qurman Jańabaev 100 qoı, 50 jylqy men 30 sıyrdy nesıege berýge nıetti. Jylyoı aýdanynda tirkelgen «Ashysaı» sharýa qojalyǵynyń jetekshisi Baqtyǵalı Jıenqulov 300 qoı-eshki men 30 jylqyny nesıege bergisi keledi.
Aqtóbe oblysynda turatyn kásipker Kámshat Tóleýovanyń aıtýyna qaraǵanda, kórshi óńir fermerleri atalǵan baǵdarlamamen jumys isteýdi erte bastaǵan eken. Ol bul baǵdarlamanyń tıimdiligine toqtalyp, tájirıbıesimen bólisti.
«Biz nesıege mal berýdi erte bastadyq. Aqtóbe oblysyndaǵy iri sharýashylyǵy bar kooperatıvter tórt túlikti jumyssyzdar men ataýly áleýmettik kómek alýshylarǵa berip keledi. О́zim taýarly nesıege 4 myń qoı men 120 sıyr berdim. Qazir nesıege berilgen maldyń 40 paıyzyn qaıtardym», deıdi K.Tóleýova.
Atyraý oblystyq Aýyl sharýashylyǵy jáne jer qatynastary basqarmasynyń basshysy Amangeldi Salamattyń málimetine súıensek, byltyr «Aýyl amanaty» baǵdarlamasyna qatysýshylardyń 192 jobasyna qarjy berilgen. Qurmanǵazy aýdanynda – 36, Inderde – 35, Mahambet aýdanynda 30 jobaǵa qarjylaı qoldaý kórsetilgen.
«Byltyr «Aýyl amanaty» baǵdarlamasy aıasynda aýyldardaǵy qosalqy sharýashylyqty damytýǵa baǵyttalǵan jobalardy qarjylandyrýdyń nátıjesinde jumyssyz júrgen 36 adamnyń kásibin bastaıtyny, jańadan 199 jumys orny ashylatyny kózdelgen edi. Qazir 40 jańa jumys orny qurylyp, mindetti tólemderi tólendi. Nesıe alýshylardan qaıtarylǵan qarjyny 1 kooperatıv pen 10 shaǵyn kásip ıesine berý prosedýrasy júrip jatyr. Joba aıasynda 908 iri qara, 1 010 jylqy, 1 215 qoı satyp alyndy», dep málimdedi A.Salamat.
Aıtýynsha, qosymsha jobalardy júzege asyrý maqsatynda Aýyl sharýashylyǵy mınıstrligine bıýdjettik ótinim joldanǵan. Bul másele oń sheshimin tapsa, qarjy beriletin jobalar sany artady.
Atyraý oblysy
