Sýret: kaz.globalnews.kz
BUU Bas Assambleıasynyń 79-sessııasy aıasynda Qazaqstan Premer-Mınıstriniń orynbasary – Syrtqy ister mınıstri Murat Nurtileý Marokko Koroldiginiń Syrtqy ister, afrıkalyq yntymaqtastyq jáne sheteldegi marokkolyqtar jónindegi mınıstri Naser Býrıtamen ekijaqty kezdesý ótkizdi.
Mınıstrler saıası, saýda-ekonomıkalyq, ınvestısııalyq jáne mádenı-gýmanıtarlyq salalardaǵy ekijaqty qatynastardyń qazirgi ahýaly men keleshegin talqylady.
Kelissózderdiń qorytyndysy boıynsha Qazaqstan jáne Marokko azamattary jaramdy ulttyq, jalpyazamattyq pasporttardyń negizinde eki eldiń aýmaǵyna kirý, shyǵý, tranzıtpen ótý jáne ýaqytsha bolý úshin vızalyq talaptardan bosatylady. Qujatqa sáıkes, árbir bolý merzimi kirý sátinen bastap 180 kúnniń ishinde 30 kúntizbelik kúnnen aspaýǵa tıis.
Sonymen qatar kelisimde kózdelgen merzimnen uzaq bolýdy nemese eńbek qyzmetimen, bilim alý nemese kásipkerlikpen aınalysýdy josparlaǵan taraptardyń azamattary qabyldaýshy memlekettiń dıplomatııalyq ókildikteri nemese konsýldyq mekemelerinen tıisti vıza alýǵa mindetti.
Kelisim taraptardyń qajetti ishki memlekettik rásimderdi aıaqtaǵany týraly sońǵy jazbasha habarlamany dıplomatııalyq arnalar arqyly alǵan kúnnen bastap 30 kúntizbelik kún ótken soń kúshine enedi.
