Shara sportsúıer qaýymdy jáne salaýatty ómir saltyn ustanatyn 400 adamnyń basyn qosty. Olardyń basym kópshiligi – memlekettik qyzmetshiler. Ortalyq memlekettik organdardyń basshylary, qyzmetshileri júgirý mádenıetin qalyptastyrý ıdeıasyn qoldap, qaıyrymdylyq sharasyna belsendi túrde atsalysty.
Qazaqstan Respýblıkasy Prezıdentiniń janyndaǵy Memlekettik basqarý akademııasynyń rektory Erlan Ábil shara elimizde alǵash ret ótkizilgenin jáne aldaǵy ýaqytta jalǵasyn tabatynyn aıtty.
«Búgin biz salaýatty ómir saltyn jáne júgirýdi nasıhattap qana qoımaı, tarıhı sáttiń kýási bolyp turmyz. Qazaqstan Respýblıkasynyń Memlekettik qyzmet isteri agenttigi, Qazaqstan Respýblıkasy Prezıdentiniń janyndaǵy Memlekettik basqarý akademııasy jáne Prezıdenttik Akademııa túlekteriniń alıansy mundaı aýqymdy sporttyq júgirý sharasyn alǵash ret uıymdastyrdy. Bul shara aldaǵy ýaqytta elordamyzda jyl saıyn dástúrli túrde ótetin sporttyq sharaǵa aınalady degen úmittemin. Seriktesterimizge, memlekettik qyzmetshilerge jáne qala turǵyndaryna alǵys bildiremin», – dedi Erlan Qýanyshuly.
Akademııa magıstranty, memlekettik qyzmetshi Arsen Gýbashev sharaǵa qatysýǵa biraz ýaqyt daıyndalǵan.
«Búgingi ELGE QYZMET RUN sporttyq júgirý jarysyna Akademııa magıstranttary túgel qoldap qatysty. Júgirýge ótetini týraly bilgen kúnnen bastap daıyndaldym. Bul shara birinshi kezekte salaýatty ómir saltyn nasıhattaýǵa baǵyttalǵan. Batys Qazaqstan oblysy, Oral shaharynda kóp jyldan beri júgirýmen aınalysyp, sportty nasıhattap júrmin», – dedi ol.
Qatysýshylar 10 km, 5 km jáne 2,5 km araqashyqtyq boıynsha júgirdi. Absolıýtti jeńimpazdarǵa I, II, III dárejeli dıplom men syılyqtar tabystaldy. Sondaı-aq jas erekshelikterine baılanysty ártúrli sanatta jaqsy nátıje kórsetken qatysýshylar da júldeli oryndar ıelenip, syılyqtarmen marapattaldy. Barlyǵy 90 qatysýshy syılyqtarǵa ıe boldy.
