QAZAQSTAN MEN TÚRKIIа BIYL EÝRAZIIаDAǴY EŃ BELSENDI ELDER BOLYP TABYLADY

Keshe Astanada EQYU-nyń Is basyndaǵy tóraǵasy, Qazaqstan Respýblıkasynyń Memleketik hatshysy – Syrtqy ister mınıstri Qanat Saýdabaev Azııadaǵy ózara is-qımyl jáne senim sharalary jónindegi keńes (AО́SShK) tóraǵasy, Túrkııa Syrtqy ister mınıstri Ahmet Dáýitoǵlymen kezdesip, kelissóz júrgizdi. Eýrazııa kontınentindegi qaýipsizdiktiń saqtalýyn qada­ǵa­laıtyn eki uıymnyń basshylary áńgime barysynda osy máseleni talqylap, sonyń ishinde Qyr­ǵyz­standaǵy jaǵdaı týraly pikir al­masty. Ondaǵy jaǵdaıdyń turaq­syz­dyǵyna alańdaýshylyq bildir­gen suhbattasýshylar osy eldegi jaǵdaıdy turaqtandyrý, ondaǵy quqyq tártibin ornyna keltirý, sondaı-aq áleýmettik-ekonomı­kalyq ótkir problemalardy sheshý úshin halyqaralyq qoǵam­dastyqtyń kúsh-jigerin úılestirý qajet ekendigin atap ótti. 27 maýsymǵa belgilengen referendým Qyrǵyzstan qoǵamyndaǵy jaǵ­daı­dy ońtaılandyrýǵa kómek kór­setedi dep úmit etken eki tór­aǵa ózderi basshylyq jasaıtyn uıymdardyń áleýetin osy shara­nyń durys ótýine múmkindiginshe molynan jumyldyratynyn málimdedi. Sonymen birge, Q.Saýdabaev pen A.Dáýitoǵly ústimizdegi jyl­dyń mamyr-maýsym aılarynda Túrkııa Prezıdenti Abdýlla Gúldiń Qazaqstanǵa, al Qazaqstan Prezıdenti Nursultan Nazar­baev­tyń Túrkııaǵa jasaǵan saparlary ekijaqty ǵana emes, kópjaqty yn­tymaqtastyqty tereńdete tú­sýge aıtarlyqtaı serpin bergenin atap kórsetti. Sonyń ishinde Ystambulda bolǵan sammıtte AО́SShK-ge tóraǵalyq etý mindeti Qazaqstannan Túrkııaǵa kósh­ke­nine nazar aýdaryldy. A.Dáýit­oǵly Nursultan Nazarbaevtyń bastamasymen qurylǵan osynaý uıym Ankara tóraǵalyq etken ýaqytta odan ári nyǵaıyp, aı­maqtyq jáne ǵalamdyq qaýip­siz­dikti saqtaýdyń tetigi retinde alǵa qoıǵan maqsatyn odan ári tıimdi oryndaı beredi degen senim bildirildi. EQYU men AО́SShK ara­syn­daǵy ózara is-qımyldardyń pers­pektıvalaryn talqylaý bary­syn­da suhbattasýshylar ústimizdegi jyldyń maýsym aıynda Ys­tam­bulda Qazaqstannyń usynysymen ótkizilgen EQYU-AО́SShK fo­rýmynyń birinshi kezdesýi tıimdi shara bolǵanyn atap kór­setip, ony Qazaqstan Prezıdenti­niń ıdeıasyna sáıkes kontınentaldyq qaýipsizdiktiń tuǵyrnamasyna aınaldyrýdyń múmkindikteri týraly pikir almasty. Sondaı-aq kezdesý barysynda 16-17 shilde kúnderi Almaty qala­synda bolatyn EQYU Syrtqy ister mınıstrleri beıresmı keńesiniń yqtımal kún tártibine qatysty da máseleler talqylanyp, oǵan baılanysty eki jaqtyń ustanymdary jaqyn ekendigine ekpin túsirildi. Sonyń ishinde qazirgi zamanǵy qaýip-qaterler, aýǵan problematıkasy, ózara senimdi arttyrý, sonymen birge, eýroatlantıkalyq jáne eýr­azııa­lyq qaýipsizdik arhıtektýrasy, EQYU-nyń tıimdiligin arttyrý, uzaqqa sozylǵan kıkiljińderdi beıbit retteý, t.b. máseleler boı­yn­sha taraptardyń ustanymdary uqsas ekendigi atap aıtyldy. Túrik jaǵy ústimizdegi jyl­dyń aıaǵynda Qazaqstannyń bas­ta­masymen EQYU sammıtiniń ót­kizilýin shynaıy túrde qoldaı­ty­nyn bildirip, onyń kún tárti­bindegi máselelerdiń mazmundy bolýyna úles qosýǵa daıyn eke­nin jarııa etti. Kezdesýden keıin mınıstrler jýrnalısterdiń aldyna shyǵyp, kelissóz qorytyndysy boıynsha brıfıng berdi. Bizdiń aramyzda birlesken is-qımyldarǵa, sonyń ishinde Qyrǵyzstanda turaqty­lyq­ty qalpyna keltirý máse­leleri boıynsha mańyzdy pikir alysýlar boldy, dedi óziniń sózinde Q.Saýdabaev. Sizder Qa­zaqstan Prezıdenti N.Nazarbaev­tyń daǵdarystyń birinshi kúninen bastap kórshiles, ári týysqan elde turaqtylyq  ornatýǵa kúsh salǵanyn bilesizder. Búgin biz de sol baǵytta kelissóz júrgizip, túrkııalyq áriptesimmen is-qımyldarymyzdy birlese jumsaý qajettigine kelistik. Túsinistik jaǵdaıynda ótken kelissóz úshin Dáýitoǵly myrzaǵa alǵysymdy bildiremin. Túrik Respýblıkasynyń Syrt­qy ister mınıstri Ahmet Dáýitoǵly da ózin Astanada týǵan úıine kelgendeı sezinetinin atap ótip, áriptesimen dástúrli túrde aı saıyn derlik kezdesip turaty­nyn aıtty. Qyrǵyzstandaǵy jaǵdaıdy turaqtandyrý úshin biz qoldan kelgen barlyq kómegimizdi jasaımyz, 27 maýsymda bolatyn referendýmnan keıin biz Qazaq­stanmen birge birlese jasaıtyn kómekterimizdi josparlaýǵa kiri­semiz, dedi túrkııalyq mınıstr. Sondaı-aq ol Kabýl konferen­sııa­sy jóninde de pikir alma­syl­ǵanyn aıta kelip, bıylǵy jyl Eýrazııa keńistiginde Túrkııa men Qazaqstan jyly bolyp turǵanyn erekshe atady. Jaqsybaı SAMRAT.