Foto: istockphoto.com
47 ýnıversıtettiń 700 oqytýshysy Tech Orda baǵdarlamasynyń arnaıy aǵyny aıasynda Jasandy ıntellekt jáne Game Development baǵyttary boıynsha qarqyndy oqytýdan ótedi.
Oqytý «Trenerlerdi daıyndaý» (ToT) júıesi sheńberinde uıymdastyrylady. Bul oqytýshylarǵa tek teorııalyq negizderdi meńgerip qana qoımaı, olardy praktıkada qoldanýǵa múmkindik beredi.
«2023 jyly ótken Digital Bridge Halyqaralyq forýmynda joǵary oqý oryndarynda jasandy ıntellekt salasyndaǵy pánderdiń mazmuny men oqytý ádisterin jańartý usynyldy. Osyǵan oraı Memleket basshysy joǵary oqý oryndaryndaǵy pedagogtardyń biliktiligin arttyrýǵa tapsyrma berdi. Baǵdarlama aıasynda 650 oqytýshy Jasandy ıntellekt baǵytynda, al 50 pedagog Game Development baǵytynda oqytylady. Oqytýdy ótkizý úshin 7 qazaqstandyq IT-mektep tańdaldy. Sabaqtar onlaın jáne oflaın, sondaı-aq IT-mektepter platformalarynda oqý materıaldaryna qol jetkizýdi qosa alǵanda, aralas formatta ótedi», dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Madıev.
Oqytýshylar aptasyna eki sabaq oqıdy. Sabaqtyń uzaqtyǵy árqaısysy 90 mınýttan, ár topta 25 adamǵa deıin qamtylady. Dáris qazaq jáne orys tilinde beriledi, barlyq materıaldar, onyń ishinde beınesabaqtar eki tilde usynylady.
«Jasandy ıntellekt» baǵyty boıynsha oqý baǵdarlamasy Prompt engineering, Data analytics, Data Science jáne Computer Vision boıynsha kirispe kýrsty qamtıdy. Al, ilgeri kýrs jasandy ıntellekt, tabıǵı tildi óńdeý (Natural Language Processing) jáne tereńdetip oqytý (Deep learning) taqyryptaryn qarastyrady. Game Development baǵytynda geımdızaınnyń negizderi, kompıýterlik grafıka, modeldeý jáne tekstýralaý, rıggıng, anımasııa jáne oıyndardaǵy UI/UX negizderi, sondaı-aq oıyn ázirleý oqytylady.
