Qostanaıda joǵalǵan jasóspirim tabyldy

ASTANA. 28 sáýir. Qostanaı polıseıleri iz-tússiz joǵalyp ketken 14 jastaǵy Mıhaıl Olmezovty egis alqabynan tapty. Bul týraly Qostanaı oblystyq ishki ister departamentiniń baspasóz qyzmeti habarlady. Tártip saqshylary Mıhaıl Olmezovty 5 kún boıy izdedi. Tipti polıseıler izdestirý jumystaryn júrgizý úshin arnaıy top quryp, izshil ıttiń kómegine júgingen. Osynyń nátıjesinde joǵalǵan jasóspirim Arman aýylynyń mańyndaǵy jazyq alqaptan tabyldy. Mıhaıl Olmezovtyń anasy 22 sáýir kúni ulynyń joǵalǵany jaıynda polıseılerge habar bergen. Onyń aıtýynsha, uly keshki ýaqytta úıinen shyǵyp, Rıazanov selosyna ketken ol sodan qaıta úıine oralmaǵan. Sondaı-aq, anasy Mıhaıldyń sońǵy ýaqytta birneshe márte úıinen qashýǵa áreket jasaǵanyn aıtty. Qostanaı qalalyq ishki ister basqarmasynyń basshysy Marat Esergepov: «Joǵalǵan jasóspirimdi izdestirýge polıseılerden bólek, aýyl turǵyndary da atsalysty. Mıhaıldy syrtynan kórgender ol velosıpedpen Maıkól aýylyna qaraı baǵyt alǵanyn aıtty. Alaıda, biz ony Arman aýylyna jaqyn mańdaǵy egis alqabynan taptyq», – dedi. Qazirgi tańda jasóspirim aýdandyq aýrýhanaǵa jetkizilgen. Dárigerler onyń jaýynnyń astynda qalyp, denesi muzdap qalǵanyn aıtýda. Qazir Mıhaıl Olmezov dárigerlerdiń jiti baqylaýynda. Talǵat Raıymbek. Derek, sýret: Qostanaı oblystyq ishki ister departamentiniń baspasóz qyzmeti.