Sýretterdi túsirgen – Erlan OMAR, «EQ»
Forýmnyń alǵashqy kúni «Qoǵamdaǵy volonterlik qyzmettiń mańyzdylyǵy: Azııa elderiniń turaqty damýyna járdemdesýdegi volonterlik qyzmettiń rólin talqylaý» taqyrybynda AО́SShK Jastar keńesiniń 7-otyrysy ótti. Kezdesý qoǵamdaǵy eriktiliktiń mańyzdylyǵyna jáne onyń Azııa elderiniń turaqty damýyndaǵy róline arnaldy.
– Qazaqstan Prezıdenti Qasym-Jomart Toqaev 2022 jylǵy shildedegi otyrysta Astanada Jastar keńesiniń qoldaýymen AО́SShK-ke múshe elderdiń eriktiler qozǵalysy kóshbasshylarynyń sletin ótkizýdi usynǵan. Osylaısha, basqosýǵa álemniń ár túkpirinen volonterlik uıymdardyń kóshbasshylary, belsendi volonterler, sondaı-aq AО́SShK-ǵa múshe memleketterdiń volonterlik máselelerine jetekshilik etetin memlekettik organdardyń ókilderi jınaldy. Bul is-shara Azııanyń ár aımaǵynan kelgen sarapshylar men mamandarǵa tájirıbe, ıdeıa almasý jáne birlesken jobalardy júzege asyrý úshin taptyrmas alań bolatynyna senimdimin. Munda mádenıetaralyq dıalogke, qatysýshy elder arasyndaǵy yntymaqtastyqty nyǵaıtýǵa basa nazar aýdarylyp otyr. Forýmda kóterilgen taqyryptardyń árqaısysynyń ózindik mańyzy bar. Sebebi volonterlik qyzmettiń tek áleýmettik máselelerde ǵana emes, eldiń ekonomıkasyn ilgeriletýde de qosar úlesi zor, – dedi AО́SShK bas hatshysynyń orynbasary Chjan Lın.
Negizgi otyrystan bólek, paneldik sessııalar da uıymdastyryldy. Basqosýlar sheteldik spıkerler qatysýymen «Áleýmettik jáne ınklıýzıvti volonterlik», «Zııatkerlik volonterlik: ınnovasııalyq tásilder jáne halyqaralyq tájirıbe», «Tótenshe jaǵdaılardaǵy volonterlik qyzmet», «Eriktilerdiń ekologııalyq problemalardy sheshýge qosqan úlesi», sondaı-aq «Densaýlyq saqtaý salasyndaǵy volonterlerdiń róli» taqyrybynda ótti.
– Bizde árbir joǵary oqý ornynda júzdegen medısınalyq volonter bar. Geografııalyq turǵydan aýqymdy aımaqty alyp jatqandyqtan aýyl-aımaqtardaǵy medısınalyq mekemelerge eriktilerimiz jıi kómek qolyn sozýǵa barady. Jas volonterler em alýshylardy tirkeýge kómek beredi, olardyń aýrýlaryna baılanysty jergilikti turǵyndardy mamandandyrylǵan dárigerlerge baǵyttap otyrady. Iаǵnı volonterler densaýlyq saqtaý salasy sektoryndaǵy júktemeni azaıtýǵa kómek beredi. Búginde Úndistanda medısına baǵytynda 20 myń volonter jumys isteıdi, – dedi Úndistannan kelgen volonter Sýbrata Hazra.
Jalpy, álemde óz erkimen qoǵamǵa paıdasyn tıgizýdi kózdeıtin eriktiler qatary jyl sanap artyp keledi. Búginde jahanda 970 mıllıon volonter bolsa, onyń ishinde árbir segizinshi Qazaqstan azamaty eriktiler qataryn tolyqtyryp otyrady.
– Dárigerlik jumysymnan tys reabılıtasııa jóninde serebraldy sal aýrýymen aýyratyn balalary bar ata-analarǵa, medısına salasyndaǵy qyzmetkerlerge YouTube platformasynda tegin keńes beremin. Aqysyz túrde balalarǵa em taǵaıyndap, ońalý jolynda qajetti ádis-tásilderdi aıtyp otyramyn. Qazir elimizde men sekildi qosymsha eriktilikpen aınalysatyn áriptesterim kóp. Oǵan birden-bir sebep koronavırýs edi. Volonterler sleti eriktiler jumysynyń sapasyn jaqsartyp, sheteldiktermen tájirıbe almasýǵa múmkindik beredi, – dedi reabılıtolog dáriger Latıf Parpıev.
Jıyn qorytyndysynda qatysýshylar AО́SShK keńistiginde volonterlik qyzmetti damytý boıynsha birlesken usynymdar ázirleýge kiristi.
Is-shara búgin de jalǵasady. Eriktiler yntymaqtastyqty keńeıtý jáne volonterlik qyzmet boıynsha tájirıbe almasý boıynsha aldaǵy qadamdardy talqylaıdy.
