Foto: Aqorda
Memleket basshysy óz tańdaýyn jasaǵannan keıin otandyq buqaralyq aqparat quraldarynyń ókilderi úshin brıfıng ótkizdi. Prezıdent, eń aldymen, referendým týraly pikir bildirip, odan qandaı nátıje kútetinin aıtty.
«Búgin – tarıhı kún. Halqymyz AES salý máselesine qatysty daýys berip jatyr. Referendým – tikeleı demokratııanyń óte tıimdi tetigi. Halqymyz qandaı sheshim qabyldasa, memleketimizdiń túpki baılamy da solaı bolady. Nátıje oń bolady dep oılaımyn. Shyn máninde, bul – taǵdyrsheshti oqıǵa. Sondyqtan men referendýmdy qoldaımyn», dedi Qasym-Jomart Toqaev.
Prezıdent «Referendým qorytyndysy boıynsha halqymyz AES salýdy qoldasa, onyń qurylysyn qaı el júrgizedi?» degen suraqqa jaýap berdi.
«Bul ońaı másele emes. Úkimet taldaý jasap, tıisti kelissózder júrgizýge tıis. Meniń pikirimshe, Qazaqstanda eń ozyq tehnologııalary bar álemdik kompanııalardan quralǵan halyqaralyq konsorsıým jumys isteýi qajet. Qalǵanyn ýaqyt kórsetedi», dedi Memleket basshysy.
Jýrnalıster Prezıdentten bıyl kóktemdegi alapat sý tasqynynan keıin qandaı qorytyndy jasalǵanyn surady.
«Tıisti qorytyndy jasaldy. Biraq mundaı tabıǵat apaty búkil jer sharynda oryn alyp jatqanyna basa mán berýimiz kerek. Jaqynda ǵana Ortalyq Eýropada alapat tasqyn ótti. Onyń aldynda AQSh pen Vetnamda daýyl boldy. Sondyqtan mundaı apattardy aldyn ala boljaý qıyn. Degenmen ondaı jaǵdaıǵa daıyn bolyp, qajetti sharalar qabyldaý mańyzdy. Qazaqstan eshkimniń kómeginsiz tasqynnyń saldaryn eńsere aldy. Muny ashyq aıtý kerek. Biz adam jáne qarjy resýrstaryn osy iske jumyldyrdyq. Úkimet pen ákimder belsendi jumys istedi. Onyń nátıjesin kórip otyrsyzdar. Alapat tasqyn kezinde zardap shekken azamattar jańa baspanamen qamtyldy. Men buǵan deıin eshkim nazardan tys qalmaıdy dep ýáde berdim. Jalpy alǵanda, biz bul maqsatty oryndadyq», dedi Memleket basshysy.
BAQ ókilderi Qasym-Jomart Toqaevtan halyqaralyq dodalarda jeńiske jetken jastardy únemi qoldap júretinin atap ótip, onyń mánin surady.
«Máni tereń. Sebebi men jastardy qoldaımyn. Muny únemi aıtyp kelemin. Memleketimizdiń keleshegi – jastardyń qolynda. Ol jáı uran emes. Bul – bizdiń basty saıasatymyz. Sondyqtan keleshekte de biz jastardy qoldaımyz. Olarǵa járdem beremiz. Ásirese, daryndy jastardy qoldaýymyz kerek. Keshe ǵana muǵalimderge, ustazdarǵa marapat tabystadym. О́z sózimde muǵalimder bul qoǵamymyzdyń ozyq tulǵalary ekenin aıttym. Olar daryndy jastarǵa bilim berip jatyr. Sondyqtan jastardy da, olardy oqytyp jatqan muǵalimderdi de memleket qoldaıdy. Sonymen qatar men keshe ǵana ustazdar qoǵamymyzdyń basty keıipkeri bolýy kerek ekenin aıttym. Sondyqtan olarǵa járdem berip, ustazdardyń bedelin, qoǵamdaǵy mártebesin kóteremiz», dedi Prezıdent.
Sonymen qatar brıfıng barysynda «Qazirgi Úkimettiń jumysyna kóńilińiz tola ma?» degen suraq qoıyldy.
«Meniń oıymsha, Úkimet belsendi jumys istep jatyr. Memleket basshysy retinde qoıǵan mindetterimdi oryndaýǵa tyrysady. Jumysymyz óte qaýyrt. Ol buqaralyq aqparat quraldaryna kórine bermeýi múmkin. Aqparattardy jan-jaqtan alyp otyramyn. Jalpy, men kóp oqıtyn adammyn. Sondyqtan eldegi barlyq oqıǵadan árqashan habardarmyn. Mınıstrlerdiń jáne Úkimettiń jumysynda kemshin ketip jatqan tustar bolsa, álbette, eskertemin. Jeti aı degen kóp ýaqyt emes. Úkimet músheleri ózderin kórsetýi kerek. Eń basty mindet – el ekonomıkasynyń damýyna serpin beretin múmkindikterdi izdeý», dedi Qasym-Jomart Toqaev.
Aıta keteıik, búgin Qazaqstanda atom elektr stansııasyn salý boıynsha jalpyhalyqtyq referendým ótip jatyr.
О́z ýchaskelerinde QR Memlekettik keńesshisi Erlan Qarın, QR Premer-mınıstri Oljas Bektenov, Almaty ákimi Erbolat Dosaev jáne QR Energetıka mınıstri Almasadam Sátqalıev daýys berdi.
Buǵan deıin Seýldegi №390 jáne Tokıodaǵy №393 referendým ýchaskeleri jergilikti ýaqyt boıynsha saǵat 7:00-de daýys berý úshin birinshi bolyp ashylǵany týraly habarlanǵan edi.
59 shet memlekette daýys berý úshin 74 ýchaske quryldy. Sheteldegi barlyq ýchaskeler Qazaqstannyń dıplomatııalyq ókildikteriniń aýmaqtarynda uıymdastyrylǵan.
Esterińizge sala keteıik, 2024 jyldyń 2 qyrkúıeginde QR Prezıdenti Qasym-Jomart Toqaev AES boıynsha referendým kúnin 2024 jyldyń 6 qazanyna belgilep, ony ótkizý týraly Jarlyqqa qol qoıǵan edi.
