«Qazaqstan jáne Ortalyq Azııanyń tarıhı-mádenı murasy sheteldiń arhıvtik qorlary jınaqtarynda» ǵylymı jobasyna oraı ótken kórmede sheteldiń arhıvteri men qorlarynan alynǵan qazaq tarıhyna qatysty tarıhı jádigerlerdiń kóshirmeleri qoıyldy.
Kórmeniń ashylýynda Ortalyq memlekettik mýzeı dırektorynyń ǵylymı jumystar jónindegi orynbasary Ǵalııa Temirton ınstıtýt ǵalymdarmen birlesken jumystyń mańyzyna toqtalyp, mýzeı mamandarynyń ǵylymı qaýymdastyqpen, shetelderden kelgen ǵalymdarmen tyǵyz baılanys ornatýy tyń taqyryptardyń ashylýyna, onyń jurtshylyqqa keńinen tanystyrylýyna yqpal etetinin atap ótti. Onyń aıtýynsha, qazaq tarıhyna qatysty ǵylymı derekter arnaıy basylymdarda ǵana emes, zamanaýı kórmelerde kórinis taýyp, óskeleń urpaqtyń jadynda jańǵyryp otyrýy tıis.
R. Súleımenov atyndaǵy Shyǵystaný ınstıtýty janyndaǵy tarıhı materıaldardy zertteý boıynsha respýblıkalyq aqparattyq ortalyqtyń dırektory, tarıh ǵylymdarynyń doktory, professor, UǴA korrespondent-múshesi Merýert Ábýseıitova bul zertteýlerdiń ınstıtýt ǵalymdarynyń uzaq jylǵy jumysynyń negizi ekenin atap ótti. Búginde Reseı, Qytaı, Eýropa elderi mýzeıleri men arhıvterin zerttegen ǵalymdar qazaq tarıhynyń túrli kezeńderine qatysty qundy derekterdiń kóshirmesin elge ákeldi. Ondaǵy maqsat kóne jáne ortaǵasyrlyq derekkózderge súıene otyryp, qazaq memlekettiligi tarıhynyń shynaıy derekterine kóz jetkizý.
Kórme aıasynda «Uly dala tarıhy men mádenıeti boıynsha kartalar (erte zaman, orta ǵasyrlar, jańa zaman) katalogynyń» tusaýkeseri ótti. Katalogqa Eýrazııadaǵy geosaıasat, mádenı transformasııalar jáne halyqtar baılanysyndaǵy ózgeristerdi kórsetetin kartalar engen. Katalog Uly dala tarıhy jáne mádenıetimen aınalysatyn ǵalymdar, tarıhshylar jáne jalpy jurtshylyq úshin qundy derekkóz bolatyny anyq.
Kórmede Bern mýzeıinde saqtalyp kelgen 1868-1889 jyldary Qazaqstan men Ortalyq Azııa elderine tórt márte saıahattaǵan dıplomat ári saıahatshy Anrı Mozerdiń qorynan alynǵan HIH ǵasyrǵa tıesili kómkermeli tuskilem, júzikter, aıbalta, taǵy da basqa kóptegen jádigerler erekshe nazar aýdartady. Munymen qosa Qytaı, Fransııa, Ulybrıtanııa, Shveısarııa, Italııa, Danııa, Shvesııa jáne Vengrııadaǵy qorlardan alynǵan arhıvtik qujattar jáne mınıatıýralar, kartınalar, fotosýretter men buıymdardan turatyn vızýaldy artefaktilermen tanysýǵa bolady. Eksponattar qazaqtardyń Eýrazııanyń basqa da halyqtarymen tarıhı dıplomatııalyq baılanystaryn aıǵaqtaıdy.
Kórme 16 qazanǵa deıin jalǵasady.
