Sýretti túsirgen – Erlan OMAR, «EQ»
Aýyl ortasyna jetkende qamshylar jaq betten qarasyn kóringeni. Toqtaı qalyp jón suraýǵa oqtaldyq. Sóıtsek, balpanaqtaı bala arqalaǵan ájeı eken. Barar jerimizdi, túser úıimizdi baıyptap alaıyq degen áýelgi baılam umyt qalyp, bala arqalaǵan keıýananyń keıpi oıymyzdy bólip jiberdi. Baıaǵyda, bala kezimizde mundaı sýret tosyn bolyp kórinbeıtin, kózge úırenshikti ádet edi. Ájelerimiz kórshi úılerge qonaqqa bara jatqanda bir balany jetektep, bir balany arqalap júre beretin. Sońǵy kezde seıilip ketken sýret. Tańǵalǵanymyz da sodan. Áýeli amandastyq. О́kpek jolaýshyǵa tosyrqaı qaraǵan ájeı arqasyndaǵy balany jerge túsirdi. Aıaǵyn basady eken, basqanda qandaı, quldyrańdaı shaýyp barady.
– Apyrmaı, ózi júretin balany osynshama azaptanyp, nege arqalap júrsiz? – dep suradyq biz.
– Nemerem ǵoı, – dedi ájeı ájim basqan mańdaıyn alaqanynyń ishimen sypyra súrtip jatyp. О́zi sondaı erke. Jumyr jerdiń jumaǵy meniń arqamda turǵandaı úıden shyqsam boldy taskeneshe jabysa ketedi.
– Aýyr emes pe? – dep suraımyz biz.
– Joǵa, – deıdi ájeı, – senderge de osyndaı nemere arqalaýǵa jazsyn. Búgingi kelinder bile qoıar ma eken, burynǵylar atasy men ájesiniń arqasynda qasıet bar dep jatatyn. Ári artymnan eretin urpaq bolsyn degen kóne joralǵy ǵoı.
Jol ústinde kezdesken jany jaısań ájeniń jarty aýyz sóziniń astarynda atan túıege júk bolar mazmun jatyr edi. Bul sapardan bizdiń tapqan oljamyz osy. Sizben de bólistik.
