Festıvalge sarapshylar keńesiniń sheshimimen irikteýden ótken 10 teatr qatysyp, baq synasty. Birneshe kún qatarynan bolǵan qoıylymdardy elimizdiń tanymal teatr synshylarynan quralǵan qazylar alqasy baǵalady. Alǵashqy kúni teatr foıesinde konferensııa uıymdastyrylyp, KSRO halyq ártisi Asanáli Áshimov, Qazaqstannyń halyq ártisi Tuńǵyshbaı Jamanqulov, Qazaqstan Jazýshylar odaǵynyń tóraǵasy Mereke Qulkenov, Qazaqstannyń eńbek sińirgen qaıratkeri Nurlan Sanjaruly sekildi belgili tulǵalar BAQ ókilderi tarapynan qoıylǵan suraqtarǵa jaýap berdi. Saýaldyń kóbi Qojanyń rólin somdaǵan Nurlan Sanjarulyna qoıyldy. Konferensııadan soń da jınalǵandardyń kóbi «Qojany» qaýmalap alǵan. Bul jerde ol О́skemende oqyǵanyn aıtyp, azdy-kópti esteligimen bólisti.
Festıval shymyldyǵyn J.Aımaýytov atyndaǵy Pavlodar oblystyq Qazaq mýzykalyq drama teatry B.Soqpaqbaevtyń «Meniń atym – Qoja» qoıylymymen ashyp, Astananyń Jastar teatry «Kózime bir kórinseń, bala ǵashyq» kórinisimen japty. Iá, ekeýi de mereıtoı ıesi Berdibek Soqpaqbaevtyń shyǵarmasy negizinde sahnalanǵan. Sóıtip, jabylý saltanatynda elimizdiń tórt buryshynan jınalǵan teatr ártisteri marapattalyp, qoshemet kórsetildi.
– Osyndaı úlken óner dodasy О́skemende, Shyǵystyń tórinde ótip jatqanyna qýanyshtymyz. Jalpy, qandaı da sharany joǵary deńgeıde uıymdastyrýǵa árqashan daıynbyz, – dedi ShQO mádenıet basqarmasy basshysynyń mindetin atqarýshy Samat Kásenov.
Sonymen, marapattaý barysynda «Ekinshi plandaǵy úzdik áıel» róli «Muǵalim» qoıylymyndaǵy Narımannyń ájesin somdaǵan B. Rımova atyndaǵy Taldyqorǵan drama teatrynyń ártisi Álıhan Ydyryshevaǵa berildi. Ár marapattaýdan keıin jergilikti ánshiler ánnen shashý shashyp, bıshiler myń burala óner kórsetýmen boldy.
«Ekinshi plandaǵy úzdik er adam» atalymy boıynsha respýblıkalyq Nemis drama teatry qoıǵan «Wolgakinder» spektaklinde Vaska rólin oınaǵan Zańǵar Ahmetqazyǵa usynyldy.
«Úzdik rejısserlik sheshim» atalymy boıynsha T.Ahtanov atyndaǵy Aqtóbe oblystyq drama teatry marapattalyp, 1 mln 500 teńgeniń sertıfıkaty tabystaldy. Aıta keteıik, ár atalym ıegeri aqshalaı syılyqqa ıe boldy.
Berdibek Soqpaqbaev atyndaǵy arnaıy syılyqqa qazylar sheshimimen «Meniń atym – Qoja» qoıylymy laıyq dep tabyldy. Aıtyp ótkendeı, festıvaldiń alǵashqy kúninde J.Aımaýytov atyndaǵy Pavlodar oblystyq qazaq mýzykalyq drama teatry «Qojany» sahnaǵa alyp shyǵyp, kórermendi birde kúldirip, birde muńaıtqan.
– Osy bes kún óner merekesi boldy. Biz jyl saıyn respýblıkalyq festıvaldi elimizdiń ár qalasynda ótkizemiz. Al balalarǵa arnalǵan festıval ekinshi ret qana bolyp otyr. Bıyl Berdibek Soqpaqbaevtyń 100 jyldyǵyna arnadyq. Teatr óneri órleı bersin, – dedi Mádenıet jáne aqparat mınıstrligi Mádenıet komıtetiniń Teatr óneri basqarmasynyń bas sarapshysy Gúlnafıs Myrzasheva.
Sondaı-aq jabylý saltanatynda Shyǵys Qazaqstan oblysy ákiminiń arnaıy syılyǵy, ıaǵnı 2 mln 500 myń teńgeniń sertıfıkaty tabystaldy. Oǵan Shyǵys Qazaqstan oblystyq drama jáne operetta teatry qoıǵan «Qar qyzyn» laıyqty kóripti.
Kóziqaraqty kórermen Berdibek Soqpaqbaevtyń 100 jyldyǵyna arnalǵan Qazaqstan drama teatrlarynyń HHH respýblıkalyq festıvalinde júzden júırik shyqqan qaı teatr eken dep taǵatsyzdana kútti. Gran-prı júldesi habarlanǵanǵa deıin jergilikti ónerpazdarmen birge jas juldyz Qobylandy Bolat óner kórsetti.
Sonymen, án-shashýlardan soń sahnaǵa shyqqan akter, kesh júrgizýshisi Nartaı Saýdanbekuly jeńimpazdy habarlaýǵa ortaǵa qazylar alqasynyń tóraǵasy, teatr synshysy, professor Sanııa Qabdıevany shaqyrǵan. Ol festıval týraly óz oıyn qysqasha qaıyryp, jeńimpaz teatrdy, ıaǵnı Á.Mámbetov atyndaǵy memleketik drama jáne komedııa teatry ókilin ortaǵa shaqyryp, sertıfıkat tabystady, qurmet kórsetti. Osylaısha, dramatýrg Aqberen Elgezektiń shyǵarmasy negizindegi «Bolmaǵan balalyq shaq» qoıylymy «Úzdik spektakl» atalymyn jeńip aldy. Jetim balanyń taǵdyrynan syr shertetin avtobıografııalyq týyndy avtordyń kómeski tartqan balalyq shaǵyn sýretteıdi. Avtordyń qııalyndaǵy ǵumyry, kórgen taýqymeti, arpalysqa túsken baqytsyz kúnderi kórsetiledi. Ákesinen jastaıynan aıyrylǵan ol qorshaǵan ortadan pana izdegen. Sóıte júrip, búgingi zamannyń tulǵasyna aınala bildi. Osyndaı taǵdyrly qoıylymdy kórermen júregine jetkizgen teatr ujymynyń eńbegi elendi, eskerildi. Dý qol shapalaqpen, ónerge degen ystyq mahabbatpen festıval shymyldyǵy jabyldy. Kórermen qaýym bes kún qatarynan óner kórsetken ártistermen qımaı-qımaı qosh aıtysty.
О́skemen
