«Jastar rýhy» jastar qanaty tańerteńnen bastap Qonaev qalasynyń ortalyq kóshelerindegi úgit-nasıhat paraqshalary men jarnamalyq materıaldardy jınap shyqty. Osylaısha, aımaqtaǵy belsendiler birlese qoǵamdyq oryndardy qalpyna keltirý jumystaryn júrgizdi. Nátıjesinde, naýqannyń alǵashqy kúninde-aq Almaty oblysynyń birneshe aýdanyndaǵy kósheler tazalanyp, úgit-nasıhat materıaldary tolyǵymen alyndy. Oń bastama áleýmettik jeli qoldanýshylaryn da beıjaı qaldyrmady.
– Bul aksııa partııanyń naýqannan keıin de qoǵamǵa qyzmet etetinin ańǵartady. Referendým sııaqty úlken saıası oqıǵadan keıin tazalyqty saqtaý – halyq aldyndaǵy jaýapkershiliktiń bir kórinisi. Naýqan kezinde kósheler men qoǵamdyq oryndarǵa ilingen úgit-nasıhat materıaldary halyqqa mańyzdy aqparat jetkizdi. Biraq naýqan bitken soń olardy alyp tastap, tazalyqty qamtamasyz etý – ár azamattyń mindeti. Bul tek tazalyq emes, bizdiń mádenıetimizdiń deńgeıin kórsetedi, – dedi «Amanat» partııasy Almaty oblystyq fılıalynyń ókili Ásem Elımanova.
Bastysy, tazalyq aksııasy Almaty oblysymen shektelmeı, elimizdiń basqa óńirlerinde de jalǵasyp jatyr.
– Biz tek úgit-nasıhat kezeńinde ǵana belsendi bolǵymyz kelmeıdi. Naýqan aıaqtalǵan soń, artyna qoqys qaldyryp ketý – jat qylyq. Sondyqtan osy aksııa aıasynda eldiń jaýapkershilikti sezinýine úlgi bolǵymyz keledi. Bul – bizdiń elge, qoǵamǵa jáne óz tańdaýymyzǵa degen qurmetimiz. Qarapaıym qadam bolsa da, onyń mańyzy zor, – dedi «Jastar rýhy» JQ-nyń belsendisi Medet Bekbergenov.
