Vıdeodan alynǵan kadr
Polısııa departamenti júrgizýshilerden óte muqııat bolýdy suraıdy.
- Aýa raıynyń nasharlaýyna baılanysty (qar jaýdy, keı jerlerde kóktaıǵaq paıda boldy) 12 qazanda elorda joldarynda 118 jol-kólik oqıǵasy tirkelip, 12 adam dene jaraqatyn aldy. Jazǵy dóńgelekteri bar avtokólikterdiń jumysyn eskere otyryp, polısııa departamenti júrgizýshilerden óte muqııat bolýdy, belgilengen jyldamdyq rejımin qatań saqtaýdy, kólik tejegishin kúrt baspaýdy, qashyqtyq pen búıirlik aralyqty saqtaýdy, belgilengen oryndarda turaqqa qoıýdy, jol boıynda jeke kólikti qaldyrmaýdy, sondaı-aq patrýldik polıseılerdiń talaptaryn oryndaýdy suraıdy, – dep habarlady polısııadan.
Polıseıler astanalyqtarǵa kúrdeli meteojaǵdaılarǵa baılanysty qala syrtyndaǵy trassalardaǵy qozǵalysty mezgil-mezgil shekteıtinin eskere otyryp, qaladan tys alys saparlardan bas tartýǵa keńes beredi.
Buǵan deıin Astanada aýa raıynyń nasharlaýyna baılanysty qala mańyna qatynaıtyn birqatar avtobýstyń qozǵalysy ýaqytsha toqtatylǵan bolatyn. Sondaı-aq Ishki ister mınıstrligi aýa raıynyń nasharlaýyna baılanysty jolaýshylarǵa úndeý jasaǵanyn habarlaǵan bolatynbyz.
