Sýret: ru.freepik.com
Almatyda ótken tartysqa deıin 10 qazanda syrt alańda Aýstrııa ulttyq quramasyna 4:0 esebimen ese jibergen jigitter Slovenııa fýtbolshylaryna qarsy shıraq oınady. Jigitterge ókpe joq. Tipti 17 mınýt boıy sol qaptalmen shabýyldy óristetken Baýyrjan Islamhan Abat Aıymbetovke utymdy pas berdi. Abat yqsham qımyldap, shirene tepken. Eýropanyń tájirıbeli qaqpashylarynyń biri sanalatyn Iаn Oblak bizdiń jigitterden mundaı shabýyldy kútken joq edi. Esh qaıran kórsete almaı, kózimen uzatyp salǵan. Áýelep jetken ala dop qaqpa mańdaıshasynan qaıtty. Budan keıin de fýtbolshylar birneshe qaýipti shabýyl jasap, qarsylastyń qorǵanysyn ájeptáýir abdyratyp tastady. Tipti dopqa ıelik etý kórsetkishi de basym boldy. Degenmen 55-mınýtta Iаn Mlakardyń joıqyn soqqysyn Igor Shaskıı qaıtara almady. Esep: 0:1.
Reseılik maman Stanıslav Cherchesov ulttyq quramanyń bas bapkeri qyzmetine taǵaıyndalǵaly fýtbolshylar resmı oıyndarda jeńiske jete almaı keledi. Tórt matchtyń úsheýinde jeńildi, bir oıynda teń tústi. Qarsylastar qaqpasyna áli bir gol da soqqan joq. Esesine óz qaqpamyzǵa 8 gol ótkizip, 1 upaımen kósh sońynda turmyz.
«Toptaǵy quramanyń osaly joq. Bizdiń jigitter ár oıyn saıyn shyńdalyp keledi. Slovenııaǵa qarsy oıynda gol soǵýǵa múmkindik týǵanymen, buıyrmady. Komandalyq oıyn júıesin áli de nyǵaıtý kerek. Kem-ketikti keleshekte bútindeýge kúsh salamyz», dedi bas bapker. S.Cherchesov baptaıtyn ulttyq qurama Ulttar lıgasy aıasynda endi eki match ótkizedi. 14 qarashada Almatyǵa Aýstrııa quramasy kelse, 17 qarasha kúni syrtta Norvegııa quramasymen tartysqa túsedi. Toptaǵy úsh quramanyń enshisinde ázirge 7 upaıdan bar.
