- Juptyq saıystardaǵy elimizdiń birinshi raketkasy Anna Danılına reseılik Irına Hromachevamen birge Qytaıdyń Ýhan qalasynda ótken WTA 1000 týrnırde top jardy. Fınalda olar AQSh-tyń ókilderi – Aısha Muhammad pen Djessıka Pegýladan 6:3, 7:6 esebimen basym tústi.
- Grepplıngten Astanada ótip jatqan álem chempıonatynda elimizdiń jasóspirimder (U15, U17) men jastar (U20) qurama komandalary tabysty óner kórsetti. 88 júlde (16 altyn, 29 kúmis, 43 qola) jeńip alǵan jerlesterimiz jalpy esepte jeke-dara kósh bastady. Bul jarysta barlyǵy 30 memleketten kelgen 1 800 sportshy kúsh synasty.
- Astanada fýtzaldan elimizdiń sýperkýbogi sarapqa salyndy. «Saıran Arenada» uıymdastyrylǵan matchta el chempıony «Semeı» men el kýbogi ıegeri «Qaırat» sheberlik baıqasty. Bul tartys 3:1 esebimen almatylyqtardyń paıdasyna sheshildi. Báseke barysynda eki dopty Alısson Neves soqsa, Kaıo Rýız úshinshi goldyń avtory atandy. Semeılikter sapynan Kaıo Torres mergendik tanytty.
- Mánerlep syrǵanaýdan Almatyda ótken Denıs Tenniń memorıalynda bas júldeni oljalaǵan Mıhaıl Shaıdorov álemdik reıtıngte eki satyǵa joǵarylap, qazirde 11-orynda tur. Endi ol Fransııada shymyldyǵy túriletin Gran-prı dodasyna qatysady. Eger osy týrnırde de sátti óner kórsetse, onda jerlesimiz TOP-10-dyqqa enetini anyq. Búgingi tańda úzdikter kóshin amerıkalyq Ilıa Malının bastap tur.
- Fýtzaldan elimizdiń áıelder quramasy kelesi jyldyń 21 qarashasy men 7 jeltoqsan aralyǵynda Fılıppınde jalaýy jelbireıtin álem chempıonatynyń irikteý týrnırine daıarlyǵyn bastady. Bul kúnderi qyzdarymyz Astanada oqý-jattyǵý jıynyn ótkizip jatyr. Irikteý synynyń elıtalyq tobynda kúsh synasý qurmetine ıe bolǵymyz kelse, aldymen Nıderland pen Polshany utýymyz kerek. Bul básekeler elordadaǵy «Saıran Arenada» ótedi.
- Qurlyqtyq hokkeı lıgasynyń (QHL) bıylǵy maýsymynda jeńilisten kóz ashpaǵan Astananyń «Barys» klýbynyń bas dırektory Borıs Ivanıshev óz ornyn bosatty. Endi onyń ornyna Oleg Bolıakın («Barystyń» bas menedjeri), Rahat Marjyqbaev («Barystyń» sporttyq dırektory), Vıacheslav Borısov (jeke hokkeı klýbynyń basshysy), Baýyrjan Gaısanyń (Kókshetaý qalasynyń burynǵy ákimi, kásipker) biri kelýi múmkin degen sóz bar.
- Almatyda shańǵymen tramplınnen sekirýden el chempıonaty aıaqtaldy. K125 jattyǵýynda Danıl Vasılev bas júldeni oljalasa, Sabyrjan Momynov pen Ilıa Mızernyh kúmis pen qola medal enshiledi.
