Ult ustazy atyndaǵy jarys

Ár óńirden kelgen balýandar 8 sal­maq dárejesinde beldesýge tústi. Tartysty ótken saıysta Dıas Dáýlet (55 kg, Astana qalasy), Bekzat Ámzebek (60 kg, Shymkent qalasy), Erjan Eren­­qaıypov (66 kg, As­tana qalasy), Beı­barys Turǵanbekuly (74 kg, Aqtóbe oblysy), Nurdáýlet Baqty­baıuly (82 kg, Shymkent qalasy), Oljas Isahanov (90 kg, Qaraǵandy oblysy), Áset Júnisov (100 kg, Aqmola oblysy), Nur­sultan Qablan (+100 kg, Qostanaı oblysy) chempıon atandy. Túıe balýandar saıysynda astanalyq Jandos Seıtenov fınaldyq beldesýde Qaraǵandy oblysynan qatysqan Erqanat Moldaǵulovty jyqty. «Sport Qory» demeýshiligimen ótken respýblıkalyq týrnırdiń je­ńimpazdary men júldegerlerine dıp­lom, medalǵa qosa qarjylaı syıaqy berildi.

Týrnır barysynda Qostanaı oblysy Dene shynyqtyrý jáne sport basqarmasynyń basshysy Bekbolat Baıjanov 2018 jyly qazaq kúresinen álem chempıony atanǵan Erlan Oma­rovty «Qurmetti sport qyzmetkeri» tósbelgisimen marapattady.

Eptilik pen ushqyrlyq synǵa tústi

Shymkentte teńge ilýden XVII Qa­zaqstan chempıonaty ótti. Shy­raıly shahardyń atshabarynda ót­ken el birinshiligine 8 oblystan 19 sport­shy qatysty.

At ústindegi jaýyngerlik ónerdiń búginge mıras sporttyq saıysta qaty­sýshylar úsh stılde sheberlik synasty. «Jeti qut» stılinde shymkenttik Baqyt Tóltaı chempıon atansa, Almaty obly­synyń ókili Márlen Nursydyq kúmis, Beı­barys Sapar (Túrkistan oblysy), Dáýletııar Saparáli (Qyzylorda oblysy) qola júlde enshiledi.

«Qos qulash» stılinde Túrkistan ob­lysynyń shabandozy Rahat Qam­barovtyń aldyna eshkim túse alma­dy. Tájirıbeli sportshy óziniń sam­da­ǵaılyǵyn taǵy da kórsetip, je­ńiske jetti. Kúmis júldeger Rýs­lan Seı­dah­met (Qyzylorda oblysy), qo­la me­dal­dy qanaǵat tutqan Ásim­jan Na­rı­man (Almaty qalasy), Aıat Na­maz­baı (Jam­byl oblysy) da bola­shaǵynan zor úmit kúttiredi.

Al «bes beles» stılimen saıysqa tús­ken­der arasynda shymkenttik Azat Túlki­baıdyń mereıi ústem boldy. Túr­kis­tan oblysynyń shabandozy Dosjan Taste­mirovke kúmis, Qy­zylorda obly­synan qatysqan Aıdar Israıl men Batys Qa­zaqstan oblysynan kelgen Bek­nur Se­rikovke qola medal bu­ıyrdy.

At sport túrlerinen memlekettik jat­tyqtyrýshy Nurken Baıbórıev eresekter sapyna jańa qosylǵan jas­tardyń aryndy ekenin, ulttyq qura­manyń qata­ryna qosylýǵa umtylatyn talantty shoǵyr shyqqanyn atap ótti.

Sadaqshylarǵa syı-qurmet: páter men kólik

Ulttyq sport túrlerinen olja salyp júrgen sańlaqtarǵa da syı-qurmet kórsetilip, qoldaý, qoshemet jaq­saryp keledi. Elorda tórinde ótken V Dú­nıe­júzilik kóshpeliler oıyndarynda dás­túrli sadaq atýda olja salǵan sań­laqtar marapatqa keneldi.

Dástúrli sadaq atý federasııasynyń basshylyǵy etnosport alamanynda jeńimpaz atanǵan mergen Jánibek Qul­myrzaevqa Astana qalasynan bir ból­meli páter tartý etti. Al kúmis júl­de ıelengen Erbol Tápenovke avto­kó­lik syılady. Qola júlde oljalaǵan Qanat Qa­symhanǵa 500 myń teńge, ulttyq qura­manyń aǵa bapkeri Dıas Ahmetovke 1 mıllıon teńge berildi.

Ilgeride kóshpeliler oıyndarynda el abyroıyn asyrǵan qusbegilerge kásipkerler tarapynan avtokólik be­rilip, qurmet kórsetilgen edi. Elorda tórinde ótken dúnıejúzilik etnosport babadan qalǵan ulttyq oıyndarymyzdy ulyqtaýshy saıyp­qyrandardyń elge etene tanylýyna, syı-qurmetke kenelýine de óris ashty.