Bıyl 15-ret uıymdastyrylǵan jarystyń ashylý saltanatyna Mańǵystaý oblysynyń ákimi Nurdáýlet Qılybaı qatysty. Parıj Olımpıadasynyń chempıony Eldos Smetov pen qola júldegeri Ǵusman Qyrǵyzbaev jarystyń qurmetti qonaǵy boldy. Jarysqa 9 elden, atap aıtqanda, Qazaqstan, Saýd Arabııasy, О́zbekstan, Mońǵolııa, Qyrǵyzstan, Iran, Iordanııa, Tájikstan, Úndistannan 14 tóreshi tórelik etti.
Halyqaralyq dzıýdo federasııasynyń kúntizbesine sáıkes ótken jarysta sportshylar 14, ıaǵnı áıelder 7, erler 7 salmaq dárejesinde ózara myqtyny anyqtady.
Mańǵystaý oblysy deneshynyqtyrý jáne sport basqarmasy buqaralyq sport bóliminiń basshysy Erkin Orynbasarovtyń aıtýynsha, Turar Joldybaevty eske alýǵa arnalǵan respýblıkalyq ashyq týrnır Aqtaý qalasynda 2009 jyly bastaý alyp, 2018 jyldan beri ashyq Azııa kýbogi dárejesine kóterilip, lısenzııalyq jarysqa aınalǵan.
– Bul – halyqaralyq dzıýdo federasııasynyń kúntizbesine engizilgen mańyzdy sporttyq is-shara. Mańǵystaý oblystyq dzıýdo federasııasy Mańǵystaý oblystyq deneshynyqtyrý jáne sport basqarmasynan 2015 jyly 12 mamyrda akkredıtteýden ótti. Qazirgi tańda oblysymyzda 12 myńnan asa adam dzıýdo sportymen shuǵyldanady. Sonymen qatar 67 dzıýdo jattyqtyrýshysy bar, – dedi E.Orynbasarov.
Mańǵystaý oblystyq dzıýdo federasııasynyń vıse-prezıdenti Nurlybek Ádekovtiń aıtýynsha, Azııa kýbogi – tek sporttyq saıys emes, sonymen qatar elimizdiń sporttyq ımıdjin arttyrýǵa, halyqaralyq deńgeıde tanymaldylyqqa jetýge baǵyttalǵan mańyzdy is-shara.
– Atalǵan týrnır sporttyń damýyna, jas dzıýdoshylardyń sheberligin jetildirýge, halyqaralyq baılanystardy nyǵaıtýǵa, sporttyń rýhyn arttyrýǵa úlken úles qosady, – deıdi Qazaqstan dzıýdo federasııasynyń atqarýshy dırektory Aıbek Imashev.
Erler arasynda 60 kg salmaq dárejesinde ázerbaıjandyq M.Mýradlı, 66 kg salmaqta jerlesimiz A.Jubatqanov, 73 kg salmaqta I.Toqtasyn, 81 kg salmaqta A.Ǵaınýllın, 90, 100 kg salmaq dárejesinde tıisinshe otandastarymyz A.Arapov, B.Mádıev, 100 kg-nan joǵary salmaqta ózbekstandyq A.Shahnazarov jeńimpaz atandy. Al qyzdar arasynda barlyq salmaqta, ıaǵnı 48, 52, 57, 63, 70, 78, +78 kg salmaq dárejelerinde D.Býrkeeva, T.Ábeýova, D.Muhanbet, S.Erǵalıeva, M.Narynova, A.Jangeldına, A.Toıshybekova syndy balýan qyzdarymyz jeńisti eshkimge bermedi.
Eki kúnge sozylǵan saıys qorytyndysynda Halyqaralyq dzıýdo federasııasynyń erejesine saı reıtıngtik jarys sanalatyn ashyq Azııa kýboginiń jeńimpazdary men júldegerlerine reıtıngtik upaılar berilip, syı-sııapat tabystaldy.
Mańǵystaý oblysy
