Bas qalanyń temir jol qaqpasy jyldar ótken saıyn elordamen birge órkendep, ósip keledi. Jolaýshylarǵa túrli qyzmet kórsetý sapasy burynǵyǵa qaraǵanda edáýir jaqsarǵan, kelip-ketip jatatyn jolaýshylardyń demalyp, tynyǵýlaryna barlyq jaǵdaı jasalǵan. Astananyń temir jol vokzaly búginde elordanyń kórkine kórik qosatyn, ajaryn aıshyqtaı túsetin, toǵyz joldyń torabyna ornalasqan eńseli oryn-jaıdyń birine aınalyp otyr.
– Jolaýshy poıyzdaryn jóneltý jáne qabyldaý Astana stansasy bas parkiniń úsh joly arqyly tórt baǵyt boıynsha júzege asyrylady, – dedi Astana temir jol vokzalynyń bastyǵy Qaırat Maıdın bizben áńgimesinde. – Birinshi baǵyt – Astana – Altyn shoqy boıynsha Reseıdiń Ońtústik-Oral temir jolyna qosylady. Ekinshi baǵyt – Astana – Petropavl, úshinshi – Astana – Qulyndy, al tórtinshi baǵyt – Astana – Moıynty-Saıaq stansalary boıynsha Qyrǵyzstan men Qytaı Halyq Respýblıkasyna shyǵady. Jalpy, Astana arqyly 76 poıyz, onyń ishinde 58 jolaýshylar jáne 18 qala mańyna júretin poıyzdar qatynaıdy.
Astana temir jol vokzalynyń bastyǵy Qaırat Maıdınniń aıtýynsha, qazirgi kezde Astana stansasy 52 jolaýshylar poıyzyn qabyldap, jóneltip júr. Onyń 10-y, ıaǵnı bes juby – halyqaralyq baǵyttarǵa, al 24-i – oblysaralyq baǵyttarǵa qatynaıtyn jolaýshylar poıyzdary. Sonymen qatar, elordanyń temir jol stansasynan tranzıttik poıyzdar da ótedi. Astanalyq temir jol vokzaly elimizdiń barlyq oblystary ortalyqtaryna, sondaı-aq TMD elderiniń Máskeý, Mınsk, Kıev, Brest, Sankt-Peterbýrg, Sverdlovsk, Bishkek, Tashkent, Omby jáne halyqaralyq baǵyttar boıynsha qatynaıtyn Berlın, Varshava, Úrimji qalalarymen de tyǵyz baılanysta jumys isteıdi.
– Temir jol vokzalynyń syıymdylyǵy 1800 jolaýshyǵa eseptelgen, – dedi vokzal bastyǵy ári qaraı. – Poıyzdardan túsken jáne poıyzdarǵa otyratyn jolaýshylarǵa arnaıy jabdyqtalǵan eki otyrǵyzý platformasy qyzmet kórsetedi. Jolaýshylarǵa qolaıly jaǵdaı týǵyzyp, olarǵa servıstik qyzmet kórsetý maqsatynda vokzalda eskalatorlar jáne múgedekter úshin lıftiler ornatylǵan.
Biz buǵan vokzal ishin jáne perrondardy aralaý kezinde anyq kóz jetkizdik. Jarnamalyq quraldar, jolaýshylarǵa qajetti aqparattar, telemonıtorlar, taǵy basqalar jetkilikti. Dıktor qaısy poıyzdyń kelgenin, qashan júretinin, olardyń qaısy jolǵa toqtaıtynyn qazaq jáne orys tilderinde jıi-jıi habarlap turady. Vokzal ǵımarattarynda toǵyz aqparattyq stend ornatylǵan. Onyń úsheýinde jolaýshylar poıyzdarynyń kestesi, altaýynda aqparattyq erejeler kórsetilgen.
– Jol júrý qujattary (bıletter) “Jolaýshy tasymaly” AQ-tyń 19 bılet kassalary arqyly satylady, – dedi Qaırat Maıdın bılet satatyn kassalar zalyna kelgenimizde. – Bulardan bólek vokzalda jolaýshylar poıyzdaryna bos orynnyń bar nemese joq ekeninen aqparat beretin elektrondy tablo, “105” nómirli birtutas kóparnaly “jabyq” anyqtama bıýrosy da ornatylǵan. Sonymen qatar, jolaýshylardyń jol júrý bıletterin ınternet arqyly rásimdeý jelisi de engizilip otyr. Olarǵa bıletter kezekten tys satylady.
Bılet satatyn jáne jolaýshylardyń kútý zaldarynda da adam sany edáýir mol kórindi. Kassa aldynda kezekte turǵan orta jastaǵy jigitti áńgimege tarttyq. О́zin Qojanazar Aqbúrkitov dep tanystyrǵan azamattan vokzal qyzmeti jóninde suraǵan edik. “Jumys babymen Astanadan Almatyǵa jıi baryp turamyn, – dedi ol. – Kelgenime 10-15 mınóttiń shamasy boldy. Bılet satatyn kassalardyń barlyǵy jumys istep tur. Vokzal qyzmeti burynǵyǵa qaraǵanda jaqsarǵan. Kemshilik, olqylyqtar baıqalmaıdy. Eńseli elordanyń temir jol qaqpasy, onyń ishinde temir jol vokzaly osyndaı bolýy qajet”.
Vokzal kesheninde tórt kútý zaly, bir qonaq úı, úsh júk saqtaıtyn orynjaı, eki servıstik ortalyq, on bankomat, valıýta aıyrbastaıtyn pýnkt, dárihana, namazhana, taǵy basqa da kóptegen oryndar jolaýshylarǵa qyzmet kórsetip tur. Sondaı-aq qoǵamdyq tártipti saqtaıtyn polısııa qyzmetkerleri men kóshi-qon polısııasy, áskerı komendatýra, sanıtarlyq epıdemııalyq stansa kúndiz-túni jumys isteýde.
Vokzal bastyǵynan áńgime barysynda vokzaldyń jolaýshylarǵa qyzmet kórsetý sapasyn arttyrýdaǵy perspektıvalyq josparlaryn da suraǵan edik.
– Alda turǵan jumys josparymyz aýqymdy, – dedi Qaırat Maıdın osy jaıynda. – Eń bastylaryn atap óteıin, dıktordyń jumys ornyn avtomattandyrý, 2011 jyly ótetin qysqy Azııa oıyndaryna baılanysty vokzal qyzmetkerlerine aǵylshyn tilin úıretýdi tereńdetý, anyqtama-aqparattyq jabdyqtarǵa jańa tehnologııalardy engizý, taǵy basqalar. Bul jumystardyń barlyǵy jolaýshylarǵa sapaly qyzmet kórsetýdi kózdeıdi. О́ıtkeni, elordaǵa atbasyn burǵysy keletinder qatary jyl ótken saıyn eselep artyp keledi. Olarǵa oıdaǵydaı qyzmet kórsetý – bizdiń mindetimiz.
Álısultan QULANBAI, Sýretterdi túsirgen Orynbaı BALMURAT.
