Foto: Úkimettiń baspasóz qyzmeti
ShYU ÚBK otyrysynda bıyl shildede Astanada ótken sammıt aıasynda memleketter basshylary deńgeıinde qol jetkizilgen ýaǵdalastyqtardy iske asyrýǵa nazar aýdaryldy. Saýda-ekonomıkalyq jáne mádenı-gýmanıtarlyq salalardaǵy yntymaqtastyqty jańa jaǵdaılarda, onyń ishinde Belarýstiń Uıymǵa tolyqqandy múshe memleket mártebesin alýyn eskere otyryp, tereńdetý sharalary qaraldy.
О́tken jyly Qazaqstannyń ShYU elderimen taýar aınalymy 6%-ǵa ósip, $66,7 mlrd-ty quraǵan. Jalpy alǵanda, ShYU memleketteriniń álemdik JIО́-degi úlesi 30%-dy quraıdy, birlestik ishindegi saýda-sattyq jalpy kólemniń tórtten birinen asqan.
Oljas Bektenov QR Prezıdenti Qasym-Jomart Toqaev pen ShYU-ǵa qatysýshy elderdiń kóshbasshylary múshe memleketter arasyndaǵy kópjosparly yntymaqtastyqty odan ári damytý úshin strategııalyq negiz qalaǵanyn atap ótti. Osyǵan baılanysty, jahandyq ekonomıka damýynyń baıaýlaýy jaǵdaıynda saýdadaǵy turaqty serpindi qamtamasyz etý maqsatynda ósimniń jańa múmkindikteri qajet.
Qazaqstan tarapy sıfrlandyrý men onlaın-saýdany damytý, áriptestik port-logıstıkalyq jelini qurý sheńberinde qoldanystaǵy temirjol jáne avtomobıl joldaryn jańǵyrtý, energetıka jáne ınvestısııa salalaryndaǵy ózara tıimdi kooperasııa qajettigin atap ótti. Klımattyń ózgerýi, qaldyqtardy tıimdi basqarý salasyndaǵy sharalar keshenin iske asyrýǵa, sondaı-aq bilim berý jáne densaýlyq saqtaý mekemeleri arasyndaǵy baılanystardy nyǵaıtýǵa erekshe nazar aýdaryldy. Atalǵan salalardaǵy tyǵyz yntymaqtastyq Shanhaı ondyǵy elderiniń ornyqty damýy men órkendeýine qolaıly jaǵdaı jasaýǵa múmkindik beredi.
Otyrys barysynda ShYU-ǵa múshe memleketter delegasııalarynyń basshylary: Pákistan Islam Respýblıkasynyń Premer-Mınıstri Shahbaz Sharıf, Belarýs Respýblıkasynyń Premer-Mınıstri Roman Golovchenko, Qyrǵyz Respýblıkasynyń Mınıstrler kabınetiniń tóraǵasy Aqylbek Japarov, Reseı Federasııasy Úkimetiniń tóraǵasy Mıhaıl Mıshýstın, Tájikstan Respýblıkasynyń Premer-Mınıstri Kohır Rasýlzoda, О́zbekstan Respýblıkasynyń Premer-Mınıstri Abdýlla Arıpov, Qytaı Halyq Respýblıkasy Memlekettik keńesiniń Premeri Lı Sıan, Iran Islam Respýblıkasynyń ónerkásip, taý-ken ónerkásibi jáne saýda mınıstri Mýhammed Atabak, Úndistan Respýblıkasynyń syrtqy ister mınıstri Sýbramanııam Djaıshankar, sondaı-aq ShYU bas hatshysy Chjan Mın, ShYU Aımaqtyq terrorızmge qarsy qurylymy Atqarýshy komıtetiniń dırektory Rýslan Mırzaev, Azııadaǵy ózara is-qımyl jáne senim sharalary jónindegi keńesi bas hatshysynyń orynbasary Chjan Lın, TMD bas hatshysynyń orynbasary Ilhom Nematov, baqylaýshy memleket úkimetiniń basshysy – Mońǵolııa Premer-Mınıstri Lývsannamsraın Oıýýn-Erdene jáne arnaıy qonaq – Túrikmenstannyń Mınıstrler kabıneti tóraǵasynyń orynbasary, syrtqy ister mınıstri Rashıd Meredov sóz sóıledi.
Otyrys qorytyndysy boıynsha 8 qujatqa qol qoıyldy, onyń ishinde ShYU-ǵa múshe memleketter arasyndaǵy «Jańa ekonomıkalyq dıalogty» damytý tujyrymdamasy týraly sheshim qabyldandy.
