Qordyń qaıyrymdylyq operatory «Samruk-Kazyna Trust» KQ bas dırektory Alfııa Adıevanyń aıtýynsha, kitaphana osyndaı sıpattaǵy alǵashqy, jalǵyz mádenı mekeme bolmaq. Aýmaǵy myń sharshy metrge jýyqtaıtyn ǵımarat jylyna 1000 oqyrmanǵa qyzmet kórsete alady.
Barlyq turǵyda qazirgi zaman talaptaryna saı arnaıy kitaphanada Braıl qarpindegi kitaptar men dybystalatyn ádebıetten tys, «Braılıst», «Jedel kómekshi», «Tıflokomp» úıirmelerinde nusqaýshy mamandar bilim berý qyzmetimen aınalysady dep kútilip otyr. Sondaı-aq jańa rýhanı oshaqta kovorkıng-ortalyq shyǵarmashylyq suhbat aıasynda túrli jas shamasyndaǵy adamdardyń, onyń ishinde jastardyń basyn qosady.
Eske sala ketsek, buǵan deıin «Abaı oblysynyń kitaphanalaryn jańǵyrtý» jobasy aıasynda qor tarapynan Semeı qalasynyń qazirgi jumys istep turǵan zaǵıp, nashar kóretin azamattarǵa arnalǵan eski kitaphanasyna arnaıy tehnıkalyq qural-jabdyq tabystalyp, Abaı atyndaǵy oblystyq ámbebap kitaphanada zamanaýı qoǵamdyq keńistik ashyldy.
Zamanaýı kitaphanalar onyń materıaldyq-tehnıkalyq jaı-kúıi, kovorkıng aımaqtarynyń qyzmeti halyq suranysyna sáıkes bolýy qajet. Sondyqtan jobanyń negizgi maqsaty – bilim berýdiń zamanaýı ınteraktıvti, kommýnıkatıvti túrlerin qurý arqyly oqyrmandardyń zııatkerlik demalysqa degen qyzyǵýshylyǵyn arttyrý.
«Joba aıasynda Semeı qalasynyń kitaphanalaryna qaıyrymdylyq kómek kórsetilip keledi. Abaı atyndaǵy oblystyq ámbebap kitaphanada barlyq qala turǵynyna, balalarǵa arnalǵan tegin qoǵamdyq ınnovasııalyq robottehnıka zerthanasy, kovorkıng-oqý zaly men oıyn-shyǵarmashylyq alańy ashyldy. Al nashar kóretin azamattarǵa arnalǵan kitaphana endi óz oqyrmandaryna bederli-núkteli qarippen kitap shyǵarýǵa, qyzmetterdiń keńeıtilgen aýqymyn kórsetýge, basqa da jerlerde is-sharalar ótkizýge qaýqarly», deıdi jobany iske asyrý tapsyrylǵan «Kemeldi qadam» QQ-nyń tóraǵasy Gaýhar Karmenova.
Búginde oblystyq kitaphana eresek oqyrmandardy eseptemegende 2500-den astam balaǵa qyzmet kórsete alady.
«Kitaphanany jańǵyrtý nátıjesinde balalar men jasóspirimderdiń zııatkerlik damýyna, olardyń mádenı bos ýaqytyn tıimdi ótkizýine, shyǵarmashylyq josparlar men kreatıvti ıdeıalardy júzege asyrýyna arnalǵan jańa, tartymdy keńistik pen alań paıda boldy. Jańa orta jas oqyrmandardyń ózdiginen bilim alýyna, kitapqa, shyǵarmashylyqqa degen qyzyǵýshylyqtaryn arttyrýǵa septigin tıgizetini anyq», deıdi oblystyq Abaı atyndaǵy ámbebap kitaphanasynyń dırektory Mereı Qart.
Ázirge eski ǵımarattaǵy arnaıy kitaphana búginde 1000-ǵa jýyq oqyrmanǵa qyzmet kórsetedi.
«Kitaphanamyzdy jańa zamanaýı jabdyqtarmen jańartýdyń mańyzdylyǵy orasan zor. Braıl júıesimen qujattardy, kitaptardy shyǵarýǵa arnalǵan jabdyqtardyń jıyntyǵy bizge erekshe qundy. Endi balalarǵa bederli-núkteli qarippen memlekettik tildegi tanymal balalar ádebıetin oqýǵa múmkindik jasaı alamyz», deıdi arnaıy kitaphana dırektory Gúlnár Gafıatýllına.
Aldabergen Kempirbaı
