Keshegi Jambyl, Kenen, Doskeı, Shashýbaılar bastaǵan halyq aqyndary men búgingi táýelsizdik jyldaryndaǵy aıtys óneriniń ortasynda altyn kópir bolǵan Kóken Shákeevtiń shyǵarmashylyǵy, aqyndyq qýaty jaquttaı jarqyrap keıingi urpaqqa úlgi bolýda. Konferensııada oblys ákiminiń orynbasary Ernar Jarkeshov quttyqtaý sóz sóılep, aıtystyń aqtanbozyna arnalǵan aýqymdy sharanyń shashbaýyn kóterisip kelgen el aǵalaryna alǵysyn jetkizdi. Aıtys óneri ótken ǵasyrdyń 80-jyldary qynnan sýyrylǵan qylyshtaı jarq etkende qýanbaǵan qazaq joq shyǵar. Sol sátte ulttyq ónerdiń tizginin qolǵa alǵan Kóken Shákeev, Manap Kókenov sekildi halyq aqyndary bastaǵan el ishindegi týma talanttardyń basyn qosyp, aıtystyń saltanatty kóshin bolashaqqa bastaǵan qazaq rýhanııatynyń taý tulǵalarynyń biri, qazirgi aıtys aqyndarynyń rýhanı ustazy, Qazaqstannyń eńbek sińirgen qaıratkeri Júrsin Erman da konferensııada sóz sóılep, Kóken aqynmen kezdesken kezindegi estelikterin aıtyp berdi.
Konferensııada ǵylymı-tanymdyq turǵyda baıandamalar oqyldy. Belgili aqyn Qorǵanbek Amanjol «Kóken aqynnyń Kókshe ónerindegi kóshbasshylyǵy», E.Bóketov atyndaǵy Qaraǵandy zertteý ýnıversıtetiniń professory, fılologııa ǵylymdarynyń doktory Qoılybaı Asanov «Keńes dáýirinde ótken aqyndar aıtysynyń qoǵamdyq-áleýmettik máni», úsh dúrkin «Altyn dombyra» ıegeri Muhtar Nııazov «Halyq aqyndary Kóken Shákeıuly men Manap Kókenov arasyndaǵy shyǵarmashylyq baılanys», Sh.Ýálıhanov atyndaǵy Kókshetaý ýnıversıtetiniń professory, fılologııa ǵylymdarynyń kandıdaty Sábıt Jámbek «Arqanyń aıtys dástúri hám arqaly aqyndary» taqyryptaryn qaýzap, tereńnen tolǵady.
Mereıtoı oblys ákimdiginiń qoldaýymen «Kóksheniń kók semseri Kóken aqyn» atty Qazaqstan men Qyrǵyz elderiniń aıtys aqyndary, dástúrli ánshileri, jyrshy-termeshileri arasynda halyqaralyq aqyndar aıtysymen jalǵasty. Halyqaralyq aıtysty Qazaqstannyń eńbek sińirgen qaıratkeri, belgili aıtysker aqyn Amanjol Áltaev júrgizdi. Aıtysqa Júrsin Erman tóraǵalyq etti. Alqaly jıynǵa Aqmola oblysynyń ákimi Marat Ahmetjanov qatysyp, aq jarma tilegin bildirdi. Alaman aıtysqa Qazaqstan Respýblıkasy Mádenıet jáne aqparat mınıstri Aıda Balaeva quttyqtaý hatyn joldady.
Qazylar alqasynyń múshesi, Qyrǵyzstan Respýblıkasy Memleket syılyǵynyń laýreaty, Qyrǵyzstannyń el jazýshysy, qoǵam jáne memleket qaıratkeri Qaırat Imanálıev eki eldiń dostyq úlgisindegi tamasha teńeýler keltirip, sóz sóıledi.
– Qazaq, qyrǵyz eki kóz bolsa, al Alataý ortadaǵy muryny. Qandaı taǵdyr bizge kez bolsa, anttasqanbyz daıyn birge turýǵa. Bizdiń tilimiz de, dilimiz de, salt-dástúrimiz de egiz. Álmısaqtan biz osylaı qustyń eki qanatyndaı bolǵan halyqpyz, – dedi ol.
Eki elden barlyǵy 18 aqyn aıtysty. Maqsat Ahanov, Jansaıa Mýsına, Muhamed Qonqaev, Nurlan Esenqulov, Aspanbek Shuǵataev syndy qazaq eliniń júırik aqyndary kórshiles qyrǵyz eliniń tókpe aqyndary Amantaı Kýtmanalıev, Azamat Bolgonbaev, Kýbat Týkeshov, Nursultan Maldybaev, Jamaıka Tokonovalarmen babadan qalǵan jyr baıraǵyn kóterip, sóz qaǵystyrdy. Eki eldiń dástúrli ánshileri Aıgúl Qosanova men Elzar О́skónbaeva, kúıshiler Bekzada Dostııarova men Zakırbek Dúıshónbekuly, jyrshylar Elmura Jańabergenova men Samat Kóchórbaev, termeshiler Arafat Ysqaqov pen Qundyz Tashtanalıeva kópshilikti ónerlerimen tánti etti.
Dúbirli dodanyń bas júldesine eki eldiń qos júırigi Maqsat Ahanov pen qyrǵyzdyń jyr qyrany Amantaı Kýtmanalıev ıe boldy.
Kókshetaý
