Is-shara Abaı oblysynda 2023 jyldyń jazynda bolǵan alapat órt kezinde qaza tapqan 15 ormanshyny bir mınýt únsizdikpen eske alýmen bastaldy. Bul oqıǵa ormanshylardyń tabıǵatty qorǵaýdaǵy kúrdeli mindetterin, qaýip-qatermen betpe-bet keletin aýyr eńbekterin taǵy bir ret eske saldy.
Jıynǵa jergilikti bılik ókilderi, qoǵam qaıratkerleri men orman sharýashylyǵy ardagerleri qatysty. Qazaqstannyń ekologııalyq áleýetin arttyrýǵa óz úlesin qosyp júrgen mamandardyń eńbegi atap ótildi. Orman sharýashylyǵy qyzmetkerleriniń kúni 2017 jyldan beri atalyp keledi jáne bul mereke – tabıǵat qorǵaýshylarynyń eńbegine degen qurmettiń aıǵaǵy.
Saltanatty jıynda Abaı oblysy boıynsha Orman sharýashylyǵy jáne janýarlar dúnıesi komıteti basshysynyń mindetin atqarýshy Evgenıı Sýrgýtanov quttyqtaý sóz sóılep, ormanshylardyń qyzmetine joǵary baǵa berdi.
«Qurmetti orman sharýashylyǵy qyzmetkerleri men ardagerleri! Sizderdiń eńbekterińiz tek ekologııalyq emes, ekonomıkalyq turaqtylyqty da qamtamasyz etedi. Qıyn jaǵdaılarǵa qaramastan, sizder ormandy qalpyna keltirip, tabıǵatty qorǵaýdan talmaısyzdar, rasymen de qurmetke laıyqtysyzdar. Sizderge densaýlyq, kúsh-qýat jáne eńbekterińizde tabys tileımin», dedi Evgenıı Sýrgýtanov.
Resmı bólimnen keıin eńbegimen erekshe kózge túsken ormanshylarǵa Qurmet gramotalary men Alǵys hattar tabystaldy. Olardyń Ertis óńiriniń qaraǵaıly ormanyn qalpyna keltirýge qosqan úlesteri joǵary baǵalandy. Is-sharanyń saltanatty bóligi konserttik baǵdarlamamen aıaqtaldy.
