Otyrysty ashqan Májilis tóraǵasy bir jarym jyldyń ishinde Qoǵamdyq palatada ár sarapshy kez kelgen másele boıynsha óz pikirin erkin jetkizetin senimdi ári isker orta qalyptasqanyn atap ótti.
– Jalpy, Qoǵamdyq palata jumysy qarqyn alyp, Memleket basshysynyń «Yqpaldy Parlament» qaǵıdasyn júzege asyrýǵa óz úlesin qosyp keledi. Eń bastysy, palata qoǵamǵa ashyq. Qoǵamdyq palatany quryp, sizderdi birlesip jumys isteýge shaqyrǵanda osyny maqsat ettik. Biz bul tásildi odan ári damytyp, jetildirýimiz kerek, – dedi E.Qoshanov.
Bankter týraly jańa zań, Salyq jáne Sıfrlyq kodekster boıynsha jumysqa erekshe nazar aýdarylady. Bul rette elimizdiń túkpir-túkpirindegi halyqtyń usynys-pikirlerin jınaqtap, talqylaý Qoǵamdyq palata músheleriniń mańyzdy mindeti ekeni aıtyldy.
Sondaı-aq Májilis tóraǵasy qabyldanǵan zańdardyń is júzinde oryndalýy jóninde qoǵamdyq palata músheleriniń pikirin surady. Onyń ishinde lýdomanııa men turmystyq zorlyq-zombylyqqa qarsy kúreske baǵyttalǵan túzetýlerdi júzege asyrý da qamtyldy.
Spıker bıyl zań jobalary boıynsha usynystar modýli iske qosylǵanyn eske salyp, máslıhat depýtattaryn zań jobalaý jumysyna tartý arqyly bul tetiktiń múmkindikterin keńeıtýdi usyndy.
Jıynda Qoǵamdyq palatanyń kún tártibindegi ózekti máseleler – sýısıdtiń kóbeıýi, jedel medısınalyq kómek júıesindegi problemalar jáne basqa da taqyryptarǵa erekshe mán berildi. Sonymen qatar E.Qoshanov saılaýshylardyń talap-tilegi boıynsha Úkimet pen Májilis depýtattarynyń birlesken jumysyna nazar aýdaryp, Qoǵamdyq palata múshelerin osyǵan atsalysýǵa shaqyrdy.
– Sessııa barysynda Úkimet músheleri bizge osyndaı máselelerdiń sheshilý barysy týraly eki ret esep beredi. Sondyqtan sizder de óz usynystaryńyzdy jınaqtap, Qoǵamdyq palata tóraǵasyna berýińizge bolady. Ol óz kezeginde Qoǵamdyq palata músheleriniń atynan Úkimetke suraqtaryn qoıa alady, – dedi ol.
О́z kezeginde Qoǵamdyq palata sarapshylary osy sessııanyń kún tártibine qatysty óz usynystaryn ortaǵa saldy. Májilistiń Áleýmettik-mádenı damý komıtetiniń tóraǵasy Ashat Aımaǵambetov áleýmettik baǵyttaǵy ózekti máselelerge toqtaldy. Eýrazııalyq tutynýshylar odaǵynyń basqarma tóraıymy Svetlana Romanovskaıa tutynýshylardyń quqyqtaryn qorǵaý standarttaryn keńinen talqylaý qajettiligine nazar aýdardy. «M.Qozybaev atyndaǵy Soltústik Qazaqstan ýnıversıteti» KAQ Dırektorlar keńesiniń tóraǵasy, Qoǵamdyq palata tóraǵasynyń orynbasary Ǵalym Baıtuq Qoǵamdyq palatanyń bedeli artqanyn atap ótip, palatanyń óńirlerdegi kóshpeli otyrystarynda talqylaý úshin taqyryptar usyndy.
Otyrys barysynda palata músheleri ózge de ótkir máselelerdi kóterdi. Bul – Qazaqstanǵa sheteldik ınvestısııa tartý, bıznesti damytýǵa jaǵdaı jasaý, mindetti áleýmettik medısınalyq saqtandyrý júıesin jetildirý, jalpy densaýlyq saqtaý salasyn damytý, jańa salyq zańnamasy, jasandy ıntellektini quqyqtyq turǵydan retteý jáne taǵy basqa.
Jıynda Erlan Qoshanov qoǵam qaıratkeri, «Astana Open Dialogue» seriktestiginiń negizin qalaýshy Aleksandr Danılovty jáne «Strategııa» áleýmettik jáne saıası zertteýler ortalyǵy» qoǵamdyq qorynyń prezıdenti Gúlmıra Ileýovany Qoǵamdyq palataǵa jańa múshe bolýymen quttyqtady.
