Foto: Sý resýrstary jáne ırrıgasııa mınıstrligi
Qyzylorda oblysynyń sharýalary sý únemdeý tehnologııalaryn engizýdiń nátıjesinde 200 mln tekshe metrge jýyq sý únemdep, atalǵan sý Aral teńizine jiberildi. Aıta ketsek, oblysta kúrish alqaptary jalpy 84 myń gektardy quraıdy, onyń 55 myń gektaryna bıyl óńir dıqandary sý únemdeý tehnologııalaryn qoldandy.
Osylaısha, 2024 jylǵy sýarý maýsymynda teńizge shamamen 1 mlrd tekshe metr sý jiberildi, bul byltyrǵy jylmen salystyrǵanda 3 ese kóp.
Jyl basynan beri Soltústik Aralǵa shamamen 2 mlrd tekshe metr sý jiberilgen. Búginde teńizdegi sýdyń jalpy kólemi 22 mıllıard tekshe metrge jetti.
«Sý dıplomatııasy men Ortalyq Azııadaǵy áriptesterimizben tyǵyz jumystan bólek, Aral teńizine sý jiberýge únemdi tehnologııalardy engizý de mańyzdy ról atqarady. Olardy qoldaný júzdegen mln tekshe metr sý únemdeýge jáne ony teńizge baǵyttaýǵa múmkindik beredi. Ol úshin biz sharýalardyń sý únemdeý tehnologııalaryn engizýge jumsaǵan shyǵyndaryn sýbsıdııalaý kólemin 50%-dan 80%-ǵa deıin ulǵaıttyq. Aldaǵy úsh jylda sý únemdeý tehnologııalarymen sýarmaly sýdy paıdalanatyn sharýa qojalyqtary úshin sýbsıdııa mólsheri 50%-dan 85%-ǵa deıin ulǵaıady», dedi sala mınıstri Nurjan Nurjigitov.
